Ladislas Ntaganzwa imbere y'inkiko mu Rwanda

Ladislas Ntaganzwa yagejejwe imbere y'urukiko ubwa mbere
Image caption Ladisalas Ntaganzwa yoherejwe kuburanishwa mu Rwanda nyuma yo gufatirwa muri Kongo

Ladislas Ntaganzwa uherutse koherezwa n'urukiko mpuzamahanga mu Rwanda yagejejwe imbere y'umucamanza bwa mbere.

Ladislas Ntaganzwa yagejejwe mu rukiko rw'ibanze rwa Nyarugunga mu mujyi wa Kigali arinzwe bikomeye n'abapolisi benshi.

Yagaragaye amwenyura, mu gihe abantu benshi bariho bumvikanye nk'abamukwena ariko babikora mu ijwi ritaranguruye.

Twaje kumenya ko abo bantu ari abakomoka i Nyakizu ndetse n'abahandi muri Butare na Gikongoro aho byemezwa ko Ntaganzwa yakoreye ibyaha.

Buhawe ijambo ubushinjacyaha bwamureze ibyaha bitanu birimo genocide aregwa ku giti cye ndetse no gushishikariza abo yayoboraga kuyikora.

Aregwa kandi no gufata abagore b'Abatutsikazi ku ngufu mbere yo kubakorera ibikorwa by'iyicarubozo.

Ubwo yari asabwe n'umucamanza kuvuga icyo atekereza ku byo ashinjwa, Ntaganzwa mu ijwi riranguruye ati: "Ndifashe".

Inshuro eshatu adasubiza

Umucamanza yabigize inshuro 3, Ntaganzwa amubwira ko ntacyo yiteguye kumutangariza.

Umunyamategeko Laurent Bugabo umwunganira we yavuze ko baje mu rukiko rwa Nyarugunga kubera gusa ko ari rwo rwegereye aho yafatiwe hagomba gusuzumirwa ikibazo cy'ifungwa cyangwa irekurwa ry'agateganyo.

Image caption Ladislas Ntaganzwa yagaragaye amwenyura

Kuri we gusubiza ibyo bibazo kuwo yunganira byasa no kwirekura mu rukiko rudafite ububasha bwo kumucira urubanza dore ko abantu boherejwe n'urukiko mpuzamahanga baburanishwa gusa n'urugereko rwihariye rw'urukiko rukuru.

Ladislas Ntaganzwa w'imyaka 52, yari Bourgmestre w'icyahoze ari Kominiya Nyakizu ubwo genocide yabaga.

Ubushinjacyaha buvuga ko yakoresheje igitinyiro yari afite agategeka gukora genocide abo yayoboraga barimo abapolisi ba Komini, interahamwe ndetse n'abaturage basanzwe barimo impunzi z'Abarundi zari muri ako gace.

Yafatiwe muri Republika iharanira Demokrasi ya Congo agezwa mu Rwanda ku itariki ya 20 z'ukwezi gushize azanywe n'abakozi b'umuryango w'abibumbye.

Icyemezo ku ifungwa cyangwa irekurwa rye ry'agateganyo kizatangazwa n'umucamanza kuri uyu wa gatatu.