Papa yagendeye abimukira i Lesbos mu Bugereki

Papa mu Bugereki Uwufise ububasha kw’isanamu Reuters
Image caption Papa Francis yakiriwe n'umushikiranganji wa mbere Alexis Tsipras (hagati) n'umukuru w'aba Orthodox, Patriarch Bartholomew

Umwungere wa Ekleziya katolika yagendeye izinga rya Lesbos mu Bugereki, mu ntumbero yo kwerekana ko yifatanije n'abari mu bibazo bagerageza guhungira ku mugabane wa Bulaya.

Papa Francis aragendera ikigo giteye bwa bohero abahunga bapfungirwamwo mu kurindira gufatirwa ingingo.

Uwufise ububasha kw’isanamu Getty Images
Image caption Abatanga infashanyo bavuga ko abimukira bapfungwa mu bigo bitameze neza na mba

Abajejwe gutanga infashanyo bavuga ko ubuzima muri ico kigo butameze neza namba.

Araza kandi guhura n'abana bo muri iyo kambi bahunze batari kumwe n'abavyeyi, imbere yo gufata umunota w'agacerere mu kwibuka abapfiriye mu nzira bajabuka Mediterranee.

Igihe yafata indege ava i Roma, Papa yabwiye abanyamakuru ko urwo rugendo rwiwe rwerekeye ico yise " inzira ibabaje" -n'akaga gakomeye karwiriye kiremwa muntu ku mugabane wa Bulaya kuva intambara ya kabiri y'isi irangiye.