Trump ashinja Ubushinwa 'gufata ku ngufu' Amerika kubera gahunda yabwo y'ubucuruzi itaboneye.

Donald Trump, igihe yavugiraga ahitwa Fort Wayne muri Indiana ku ya 1/05/2016 Uwufise ububasha kw’isanamu Reuters
Image caption Donald Trump yarahiye guhagurukira ibibazo by'ubucuruzi hagati ya Amerika n'Ubushinwa

Muri gahunda ye yo kunenga politike y'ubukungu mu Bushinwa, umukandida uri imbere mu ishyaka ry'aba Repubulikani, Donald Trump, ashinja Ubushinwa "gufata ku ngufu" Amerika.

Igihe yari ari mu bikorwa byo kwiyamamaza muri leta ya Indiyana (Indiana) yabwiye abari baje kumwumva ko Ubushinwa bufite uruhare mu "bujura bukaze bwabayeho mu mateka y'isi".

Bwana Trump, umucuruzi w'umuherwe ufite akayabo kabarirwa muri za miliyari z'amadolari, yamye arega Ubushinwa kugoreka ifaranga ryabwo kugira ngo ibicuruzwa byabwo bibashe kurushanwa ku isi.

Avuga ko ibi byazahaje ubucuruzi muri Leta Zunze Ubumwe za Amerika ndetse n'abakozi.

Ku Cyumweru yabwiye igikundi cy'abamushyigikiye ati:

"Ntidushobora gukomeza kwemerera Ubushinwa gufata ku ngufu igihugu cyacu, kandi ibyo ni byo turi gukora". "Tuzabihindura, kandi dufite ubushobozi, ntimubyibagirwe. Dufite imbaraga nyinsh ku Bushinwa."

Abigaragambya

Iyi ni inshuro ya mbere Bwana Trump akoresha ijambo "gufata ku ngufu" arihuza n'Ubushinwa mu bucuruzi, ariko rero ibikorwa bye byo kwiyamamaza byaranzwe n'amagambo akongeza ubushyamirane.

Igihe yari ari muri leta ya Kalifoniya (California) ku wa Gatanu, yahangawe n'abantu bigaragambya babarirwa mu majana, mbere yo kuvugira ijambo imbere y'inama y'abo mu ishyaka ry'aba Repubulikani. Bwana Trump yagombye kwinjirira mu muryango wo mu gikani.

Uwufise ububasha kw’isanamu AFP
Image caption Imyigaragambyo yo ku Cyumweru yari irimo uburakari bwibasira Donald Trump i Los Angeles

Abigaragambya bari barakajwe n'ibitekerezo bye ku kibazo cy'abimukira: Yavuze ko azubaka urukuta rw'umupaka rutandukanya Amerika na Mexike (Mexico) anita abanya Mexike ko "bafata ku ngufu" kandi ari abanyabyaha bafite uruhare mu kuzana ibiyobyabwenge muri Leta Zunze Ubumwe za Amerika.

Mu kwezi kwa Gatatu Bwana Trump yagombye gusubika ibikorwa bye byinshi byo kwiyamamaza nyuma y'uko abigaragambya bari barahiye ko bari bumuce mu ijambo bakabangamira ibikorwa bye mu mujyi wa Chicago na St Louis.

Mu rwego rw'abantu bashyigikira umukandida, uyu muherwe mu bijyanye n'ubucuruzi mu mazu ari imbere cyane, umukurikira ni umusenateri wo muri leta ya Texas Ted Cruz, na John Kasich wo muri Ohio.

Ku rundi ruhande, abo mu ishyaka ry'aba Demokarate, byitezwe ko Hillary Clinton azatsinda Bernie Sanders kugira ngo ahagararire ishyaka mu matora rusange mu kwezi kwa Cumi na Kumwe.