Intambara ya Siriya: Agahenge kongereweho iminsi itatu muri Aleppo

Uwmana w'umukobwa ari kugenda hagati y'inyubako zasenyuwe. Uwufise ububasha kw’isanamu Reuters
Image caption Amasezerano yo guhosha imirwano yagombaga kurangira mu masaha ya kare yo ku wa Gatandatu

Minisiteri y'ingabo mu Burusiya yavuze ko agahenge ko guhosha imirwano mu mujyi wa Aleppo kongereweho iminsi itatu kugira ngo "ibintu ntibirusheho guhuhuka".

Ingabo za Siriya zatangaje iminsi ibiri y'agahenge ku wa Gatatu nyuma y'imirwano imaze ibyumweru bibiri yishe abasivile 300.

Aka gahenge ni imwe mu nzira z'umuhate wo gushyira mu bikorwa igihe cy'ihosha ry'imirwano ryumvikanyweho mu kwezi kwa Kabiri.

Uburusiya bumaze igihe bushyigikira umuywanyi wabwo, guverinoma ya Siriya, mu kugaba ibitero binyuze mu kirere kuva mu kwezi kwa Cyenda 2015.

Aleppo, umujyi uri mu majyaruguru y'uburengerazuba bwa Siriya, wari izingiro ry'ubukungu n'inganda by'igihugu mbere y'ishozwa ry'intambara y'umwiryane imaze imyaka itanu.

Amakuru aravuga ko aka gahenge kazanye umutuzo mu baturage baba muri Aleppo.

Umwe uri bo, umucuruzi, Sameh Tutunji, yabwiye ibiro ntaramakuru Reuters ati: "Amaduka yafunguye abantu barahumeka". Nta masasu cyangwa ibibombe twigeze twumva twari tumaze kumenyera. Iminsi irenga 10 ishize haba ubwicanyi bwa buri munsi irahagije".

Ariko itangazamakuru rya leta ndetse n'abagenzuzi mpuzamahanga bavuze ko umuntu umwe yapfuye yishwe n'ibisasu by'inyeshyamba mu ishoro ryo ku wa Gatatu.

Ihosha ry'imirwano ryumvikanyweho n'Uburusiya na Leta Zunze Ubumwe za Amerika mu kwezi kwa kabiri, rituma impande zombi zishyamiranye zumvikana, riri hafi yo kutagira icyo rigeraho.

Ku wa Gatatu, Uburusiya bwavuze ko bwakuye indege zirasa zigera kuri 30 mu kirere cya Siriya, zirimo n'izo mu bwoko bwa Su-25 zisanzwe ziriyo.

Ingabo z'Uburusiya zatangiye gukura abasirikare babwo muri Siriya mu kwezi kwa Gatatu, nyuma y'amezi atandatu y'ibitero byari bigamije gukomeza ububasha bwa perezida Bashar al- Assad.

Mu majyepfo ya Aleppo, intambara irakomeje hagati y'ingabo za Siriya n'inyeshyamba zirimo n'izo mu mutwe wa al-Nusra Front, ushamikiye kuri al Qaeda, utanarebwa n'amasezerano y'ihosha ry'imirwano.