Abapolisi bishwe baguwe gitumo mu Misiri hafi ya Cairo

Abantu bateraniye ahabereye iraswa ry'abapolisi Uwufise ububasha kw’isanamu AP
Image caption Imodoka ya polisi yari icunze umutekano mu gace ka Helwan mu ijoro

Abayobozi mu Misiri baravuga ko abapolisi umunani bambaye imyenda ya gisivile bishwe barasiwe mu murwa mukuru Cairo.

Imodoka yabo y'umweru yaguwe gitumo mu masaha ya kare ku Cyumweru mu gitondo mu majyepfo y'akarere ka Helwan.

Minisiteri y'ubutegetsi bw'igihugu yavuze ko umurashi utamenyekanye yamishe amasasu ku modoka. Nta mutwe runaka wigambye kugaba iki gitero. Inzego z'umutekano za Misiri zimaze imyaka myinshi zirwana n'imitwe ya kiyisilamu.

Abarwanyi bashamikiye ku mutwe wa Islamic State bishe abantu benshi bakora mu nzego z'umutekano babarirwa mu majana mu gace k'umwigimbakirwa wa Sinai kuva igisirikare cyahirika ubutegetsi bwa perezida Mohammed Morsi mu kwezi kwa Karindwi muri 2013.

Ibi bitero shuma by'abarwanyi byagabwe ku bapolisi i Cairo ndetse aba barwanyi banagize uruhare mu bitero by'amabombe byagabwe mu mujyi.

Abasesenguzi bavuga ko imitwe y'abagizi ba nabi ifite uruhare muri ibi bitero ariko ko iki cyo ku Cyumweru gifite isura y'ubwiyahuzi bwa jihadi.

Abaturage babwiye ibiro ntaramakuru Reuters ko abarashi, bahise banahunga bamaze kurekura amasasu, bari bambaye ibintu bituma biyoberanya amasura.

Minisiteri y'Ubutegetsi bw'igihugu yavuze ko abapolisi barashwe barimo n'uwo ku rwego rwa liyetona ndetse n'abandi barindwi, bari bacunze umutekano igihe ikamyo yafungaga umuhanda.