FBI yahase ibibazo Hillary Clinton ku ikoreshwa rya emails

Hillary Clinton ari mu bikorwa byo kwiyamamaza Uwufise ububasha kw’isanamu AP

Hillary Clinton, umukandida w'ishyaka ry'Abademokarate mu matora y'umukuru w'igihugu muri Leta Zunze Ubumwe za Amerika yahaswe ibibazo n'urwego rw'iperereza FBI ku ikoreshwa ry'inyandiko zicishwa ku mbuga ngurukanabutumwa (emails) igihe yari minisitiri w'ububanyi n'amahanga, ibyo byatangajwe n'abashinzwe kumwamamaza.

Umuvugizi we yavuze ko ikiganiro cyabaye ku bushake bwe nta gahato.

FBI iri gukora iperereza kuri madamu Clinton n'abo bakoranaga bya hafi ireba niba barakoresheje nabi amakuru yari abitswe ku buryo bw'ibanga. Byakozwe kuri email ye y'umwihariko igihe yari minisitiri w'ububanyi n'amahanga.

Madamu Clinton ahakana ko atigeze akoresha nabi amakuru y'ibanga muri email ze.

Yavuze ko yafunguye iyo email kubera ko byari bimubangukiye. Cyakora, urwego rw'iperereza muri minisiteri rwamureze, we n'abandi baminisitiri b'ububanyi n'amahanga bamubanjirije, gucunga nabiumutekano wa za email zabo.

Ubu minisiteri y'ubucamanza iri kugenzura niba ibi bigize icyaha yakurikiranwaho mu nkiko.

Ku wa Gatanu, Umushinjacyaha mukuru muri Leta Zunze Ubumwe za Amerika, Loretta Lynch yavuze ko azemera ibizava mu iperereza rya FBI ndetse n'abashinjacyaha, mu gufata umwanzuro wo kumushinja.

Umunsi umwe mbere y'aho, byavumbuwe ko Madamu Lynch yahuye n'umugabo wa madamu Clinton, wahoze ari perezida wa Amerika, Bill Clinton, mu mubonano yasobanuye nk'ikiganiro gisanzwe ariko nawe yemera ko gishobora gushyira urwikekwe ku buryo akazi ke muri iki kibazo kabonwa.