Abasirikare benshi batawe muri yombi muri Turikiya

Imyenda n'imbuda by'abasirikare bari mu gikorwa cyaburijwemo cyo guhirika ubutegetsi babisize ku kiraro cya Bosphorus muri Istanbul. Uwufise ububasha kw’isanamu Getty Images
Image caption Imyenda n'imbuda by'abasirikare bari mu gikorwa cyaburijwemo cyo guhirika ubutegetsi babisize ku kiraro cya Bosphorus muri Istanbul.

Turikiya iravuga ko abasirikare hafi 3000 batawe muri yombi nyuma y'igikorwa cyaburijwemo cyo guhirika ubutegetsi cyaguyemo abantu bagera ku 161.

Leta iravuga ko abantu 161 biganjemo abaturage b'abasivili baguye mu mirwano yo kurengera ubwigenge bw'igihugu.

Abarenga 1400 ngo bakomeretse.

Uwufise ububasha kw’isanamu Reuters
Image caption Abasirikare bamanitse amaboko bitanga mu mujyi wa Istambul.

Leta ya Turikiya yanatangiye gukurikirana imitwe n'abantu ku giti cyabo ikekakaho gukorana n'abagerageje guhirika ubutegetsi mu ijoro ryakeye.

Ni muri urwo rwego abacamanza barenga ibihumbi bibiri na magana arindwi birukanwe ku kazi mu gihugu hose.

Ministri w'intebe, Binali Yildirim, yavuze ko abasirikare babarirwa ku 2.839 - barimo n'abafite ipete ryo hejuru - batawe muri yombi.

Uwufise ububasha kw’isanamu Reuters
Image caption Perezida Recep Tayyip Erdogan (hagati) yamaganye abashatse guhirika ubutegetsi bwe.

Perezida wa Turkiya, Recep Tayyip Erdogan, yavuze ijambo kuri televiziyo y'igihugu avuga ko kugerageza guhirika ubutegetsi bwe ari igikorwa cy'ubugambanyi cyerekanye neza ko mu gisirikare hakenewe amavugurura.

Abasirikare b'ipete rya koroneri 29 n'abajenerari batanu biravugwa ko birukanwe ku kazi.

Televiziyo ya leta yerekanye amafoto y'abasirikare babarirwa muri za mirongo barimo kwitanga mu mujyi wa Istambul aho bavaga mu bimodoka bya gisirikare amaboko bayamanitse.

Uwufise ububasha kw’isanamu Reuters
Image caption Abantu bashyigikiye Erdogan baagaragaje ibyishimo byabyo nyuma yo kuburizamo ihirika ry'ubutegetsi.

Igipolisi kiravuga ko abantu 20 mu bateguye igikorwa cyo guhirika ubutegetsi baguye mu mirwano yabereye ku biro bikuru by'igisirikare i Ankara.

Ijoro ryaranzwe n'urusaku rw'imbunda n'ibintu biturika mu mijyi ibiri ikomeye y'icyo gihugu, Istambul na Ankara.

Uwufise ububasha kw’isanamu AP
Image caption Uwo ni umwotsi wavaga mu ngoro y'umukuru w'igihugu i Ankara.

Ubu abategetsi barimo kugerageza gusubiza ibintu mu buryo vuba vuba bafungura ibibuga by'indege, ibiraro n'imihanda byari byafunzwe igihe habaga igikorwa cyo kugerageza guhirika ubutegetsi.