Libiya: Amerika yagabye ibitero byo mu kirere kuri IS

Ingabo za guverinoma ya Libiya zirwana na IS i Sirte, 21/7/ 2016 Uwufise ububasha kw’isanamu Reuters
Image caption Ingabo za guverinoma zivuga ko zafashe uduce twinshi muri Sirte

Minisiteri y'ingabo muri Leta Zunze Ubumwe za Amerika yavuze ko Amerika yagabye ibitero byo mu kirere ku birindiro by'abarwanyi b'umutwe wa IS muri Libiya, nyuma y'ubusabe bwa guverinoma ishyigikwe na LONI.

Ibitero byagabwe ku birindiro biri ku cyambu mu mujyi wa Sirte, ahari indiri y'abarwanyi ba IS.

Mu ijambo yavugiye kuri televiziyo, Minisitiri w'Intebe wa Libiya, Fayez Sarraj, yavuze ko ibitero "byashegeshe cyane."

Ibihugu by'Uburayi bimaze igihe bihangayikishijwe n'ugukomera kwa IS muri Libiya.

Ibi bitero byo mu kirere ni ibya mbere Amerika igabye bihuriweho na guverinoma ya Libiya.

Hari ibindi bitero byagabwe na Amerika ku birindiro bya IS muri Libiya mu kwezi kwa Kabiri no mu kwa Cumi na Kumwe.