Igitero mu isoko mu Buhinde: Abarwanyi bishe abantu barenga 13 mu ntara ya Assam

Kokrajhar
Image caption Ibitero kandi byanibasiye Kokrajhar mu gihe cyashize

Abategetsi mu Buhinde baravuga ko abantu bitwaje intwaro barashe bakica abantu 13 mu isoko rihinda cyane riri mu ntara ya Assam.

Intara ya Assam iri mu majyaruguru y'uburasirazuba mu Buhinde. Polisi yatunze agatoki abarwanyi b'umutwe wa National Democratic Front of Bodoland (NDFB).

Amakuru aravuga ko umwe mu nyeshyamba yiciwe n'inzego z'umutekano mu mirwano y'iki gitero mu karere ka Kokrajhar.

NDFB ishaka ubwigenge bw'agace gatuwemo n'abo mu bwoko bw'aba Bodo bakava muri Assam.

Umuyobozi wa polisi muri Assam, Mukesh Sahay, yabwiye BBC ko igitero cyagabwe mu isoko mu gace ka Balajan, hakurya y'umujyi wa Kokrajhar.

Yagize ati: "Abasivile benshi bakomeretse igihe abarwanyi barasaga mu isoko batavanguye. Banateye ibisasu bya gerenade."

Umwe mu barwanyi yarashwe aricwa none ubu abasirikare bari guhiga abandi batanu bahunze. Amazu menshi n'amaduka byangiritse cyane.

Mu 2014, abarwanyi ba NDFB bishe abantu bagera kuri 62 mu duce twa Sonitpur na Kokrajhar mu ntara ya Assam.

Ubu abo mu bwoko bw'aba Bodos bafite akanama k'ubutegetsi kagengwa na rimwe mu mashyaka yabo ryitwa Bodoland People's Front (BPF). Aka kanama gatanga ubwigenge ku mirenge irenga 3.000 ituwe n'abo mu bwoko bw'aba Bodo.

Imitwe myinshi y'inyeshyamba mu ntara ya Assam imaze igihe irwanya ubutegetsi, isaba ubwigenge bw'abaturage ihagarariye.