Ikibazo cy'abimukira mu Burayi: Ubudage bwiteze abagera ku 300.000 uyu mwaka

Abantu babarirwa mu bihumbi basabye ubuhungiro mu Budage mu mwaka ushize Uwufise ububasha kw’isanamu AP
Image caption Abantu babarirwa mu bihumbi basabye ubuhungiro mu Budage mu mwaka ushize

Umuyobozi w'urwego rushinzwe abimukira n'impunzi mu Budage yavuze ko bwiteze abimukira bagera ku 300.000 bazagera mu gihugu muri uyu mwaka.

Frank-Juergen Weise yabwiye ikinyamakuru Bild am Sonntag ko ibiro bye bizahangayika cyane nihaza abantu benshi.

Ariko yavuze ko yizera ko abimukira bashya batazarenga umubare witezwe.

Mu mwaka ushize, abimukira barenga miliyoni bageze mu Budage baturutse mu Burasirazuba bwo Hagati, muri Afganistani no muri Afurika.

Minisiteri y'Ubutegetsi bw'igihugu ivuga ko abantu barenga 390.000 basabye ubuhungiro mu mezi atandatu ya mbere muri uyu mwaka ariko ntibisobanutse umubare nyawo w'abaje mu hgihugu mbere ya 2015.

Bwana Weise yavuze ko Ubudage buzagerageza kubashakira akazi ku buryo bushoboka.

Ariko yanavuze ko "bizatwara igihe kinini ndetse n'umutungo mwinshi mbere y'uko abimukira bamenyera."

Uwufise ububasha kw’isanamu AP
Image caption Abigaragambya 15 bamaze hafi isaha hejuru y'inyubako ya Brandenburger Gate bafite ibyapa byanditseho ngo "Umutekano ku mipaka, shaka ejo heza"

Isuzuma ry'ibitekerezo by'abantu ryakozwe muri uku kwezi ryagaragaje ko kimwe cya kabiri cy'Abadage batekereza ko politike ya minisitiri w'intebe Angela Merkel atari nziza.

Amatsinda yamagana politike yo kwemera abimukira yariyongereye.

Ku wa Gatandatu umwe mu bagize itsinda ry'abahezanguni yamanitse igitambaro ku nyubako izwi yitwa Brandenburg Gate iri i Berlin, asa n'uwamagan icyo yise kugira Ubudage ubw' "abayisilamu".