Umutingito muri Tanzania wahitanye abantu 13

Ikarita ya Tanzania Uwufise ububasha kw’isanamu AP
Image caption Uwo mutingo wibasiye Bukoba hafi y'ikiyaga cya Victoria

Umutingito upima 5 n'ibice 7 ku gipimo cya Richter wibasiye amajyaruguru y'uburengerazuba bwa Tanzania hafi y'ikiyaga cya Victoria hegereye umupaka wa Uganda.

Abategetsi baravuga ko uwo mutingito wahitanye abantu 13 naho 203 barakomereka.

Amafoto yo ku mbuga nkoranyambaga yerekana amazu yangiritse mu mujyi wa Bukoba utuwe n'abantu barenga ibihumbi 70.

Benshi mu bapfuye kandi biravugwa ko ari abo muri uwo mujyi.

Umukuru w'uwo mujyi, Deodatus Kinawila, yabwiye BBC ko uwo mutingito wangije byinshi kandi ko abantu bamwe bari bajyanywe mu bitaro batashye.

Umutingito upima 6 ku gipimo cya Richter wibasiye umujyi wa Arusha uri mu burasizuba bwa Bukoba mu kwezi kwa karindwi muri 2007.

Uwo mutingito kandi wumvikaniye muri Kenya, Rwanda, Burundi na Uganda.

Umunyamakuru wa BBC uri muri Tanzania aravuga ko uyu ariwo mutingito ukaze cyane wibasiye Tanzania mu myaka 10 ishize.