Korea yepfo ngo ishobora gusenya Pyongyang

Ibifaru bya gisirikare Uwufise ububasha kw’isanamu AP
Image caption Umwuka ntumeze neza hagati ya Korea zombi.

Abategetsi bo muri Korea yepfo batangaje ko biteguye kuba basenya umurwa mukuru wa Korea ya ruguru ntihagire ibuye risigara rigeretse ku rindi biramutse bihwihwiswe ko iki gihugu kigiye kugaba igitero cy'ibisasu bya kirimbuzi bya nucleaire.

Ibiro ntaramakuru Yonhap - bikoranira hafi n'ubutegetsi bwo muri Korea yepfo - biravuga ko abagize inteko nshingamategeko bahawe amakuru yerekeranye n'uwo mugambi wo kwirinda.

Uwo mugambi ngo urimo gusenya ahantu hari ibisasu bya misile bya kirimbuzi mu mujyi wa Pyongyang.

Ibi bitangajwe nyuma y'iminsi ibiri Korea ya ruguru yongeye kugerageza igisasu cyo mu rwego rwa nucleaire bivugwa ko ari cyo cyari gifite ingufu nyinshi kurusha ibya mbere.

Uwufise ububasha kw’isanamu Reuters
Image caption Umukuru wa Korea ya ruguru Kim Jong-un amaze iminsi agerageza ibisasu bya misile bikomeye

Umwe mu bayobozi ba gisirikare muri Korea yepfo yabwiye ibiro ntaramakuru Yonhap ko uduce tw'umujyi wa Pyongyang dushobora kuba twihishemo abayobozi ba Korea ya ruguru twakwibasirwa kurusha utundi muri icyo gitero. Yavuze ko uwo mujyi "wahinduka umuyonga ntiwongere kuboneka ku ikarita y'isi".

Umunyamakuru wa BBC uri muri Korea yepfo, aravuga ko iki gihugu kirimo gukoresha amagambo akaze arimo intambara ubundi asanzwe akoreshwa na Korea ya ruguru kuri Korea yepfo.