Amatora mu Burusiya: Ishyaka rya Putin riri imbere

Dmitry Medvedev (LIbumoso) na Vladimir Putin Uwufise ububasha kw’isanamu Reuters
Image caption Bwana Putin (Iburyo) ari kumwe na Bwana Medvedev bari gushimira abarwanashyaka

Ibyavuye mu matora birerekana ko United Russia, ishyaka rya perezida Vladmir Putin, ryatsinze amatora mu nteko ishinga amategeko, ryegukana arenga kimwe cya kabiri cy'amajwi.

Kuri 90% by'amajwi amaze kubarurwa, ishyaka rifite 54,2% bisobanura nibura intebe 338 kuri 450 mu nteko ishinga amategeko.

Bwana Putin yavuze ko ryageze ku "majwi akomeye".

Ishyaka ry'abakominisite n'iryabatsimbarara ku gihugu cyane LDPR yagize 13-14%.

N'ubwo habayeho igabanuka ry'amajwi ku ishyaka rya United Russia ryagize 64% muri 2007, ryashoboye kugira ubwiganze bw'amajwi arenga 49% ryagize muri 2011.

Ishyaka riyobowe na minisitiri w'intebe Dmitry Medvedev, rizanabona izindi ntebe nyinshi mu nteko zivuye kuri 238.

Cyakora ubwitabire bw'amatora bwari hasi cyane ugereranyije n'amatora yo muri 2011. Bwari hasi ya 50%.

Amashyaka aharanira ibitekerezo byo kwishyira ukizana ntiyashoboye kugira 5% by'amajwi akenewe kugira ngo agire umwanya mu nteko ishinga amategeko.

Ariko amajwi ari kubarurwa arerekana ko ashobora kuza kugira imyanya micye mu turere tumwe na tumwe.

Amashyaka abiri atavuga rumwe na leta, Yabloko na Parnas, yabonye 2% ba 0,7% gusa.

Umukuru wa komisiyo y'amatora, Ella Pamfilova yavuze ko afite "icyizere ko amatora yakozwe mu buryo buboneye".

Uwufise ububasha kw’isanamu EPA
Image caption Abategetsi bari bahangayikishijwe no gutegura amatora atarimo ibibazo

Ariko n'ubwo ubukungu bw'Uburusiya buri mu bibazo ndetse igihugu kikaba gihanganye n'ibindi bihugu by'Uburayi na Amerika, kubera intambara muri Ukraine na Siriya, ababikurikiranira hafi bavuga ko aya matora atari ashamaje cyane.

Haravugwa kandi ko habayemo uburiganya mu duce tumwe twa Siberiya ndetse ko hari n'abatora bajyanwe mu ma bisi ku biro by'itora mu mujyi wa Barnaul.

Uwufise ububasha kw’isanamu AP
Image caption Amatora y'abatoreye muri Crimea - yatwawe n'Uburusiya muri 2014 yarakaje Ukraine

Ibiro ntaramakuru bya AP bivuga ko itsinda ry'abagenzuzi rya Golos rivuga ko ryabonye ibirego 1.300 byinubira uko amatora yagenze mu gihugu.

Ku nshuro ya mbere, abantu batoreye mu ntara ya Crimea, yakuwe kuri Ukraine muri 2014 mu buryo bwanenzwe cyane ku rwego mpuzamahanga.