17 biciwe mu myigaragambyo yamagana Kabila muri Congo

Abigaragambya muri Repubulika Iharanira Demokarasi ya Congo
Image caption Perezida Joeseph Kabila azarangiza manda ye y'imyaka ibiri ku itariki 20/12 nk'uko bitegaywa n'itegekonshinga

Abigaragambya bashyize amabariyeri mu mihanda banatwika imodoka mu murwa mukuru wa Repubulika Iharanira Demokarasi ya Congo, Kinshasa.

Ni nyuma y'uko polisi ibaburije kujya mu myigaragambyo yamagana perezida Joseph Kabila bamusaba kwegura ku butegetsi ku itariki ya 20 z'ukwa Cumi na Kabiri, igihe manda ye izaba ugeze ku musozo.

Umunyamakuru wa BBC aravuga ko minisitiri w'ubutegetsi bw'igihugu, Evariste Boshab, yahamije ko abantui 17 bapfiriye mu myigaragambyo. Barimo abapolisi batatu ndetse umwe yishwe atwitswe.

Image caption Komisiyo y'amatora ivuga ko gutegura amatora ateganyijwe mu kwa 11 birimo ibibazo

Ibiro ntaramakuru Reuters iravuga ko abatangabuhamya bavuze ko polisi yarashe amasasu mu gutatanya abigaragambyaga.

Abatavuga rumwe na leta bafite ubwoba ko Bwana Kabila ashaka gutinza amatora y'umukuru w'igihugu ateganyijwe mu kwezi kwa 11, agamije kugundira ubutegetsi.

bavuga ko itegekonshinga rimusaba kurekura ubutegetsi nyuma ya manda ze ebyiri zemewe n'amategeko.

Image caption Abigaragambya bazindukiye mu mihanda kubera kutishimira itinza ry'amatora

Abayobozi ba komisiyo y'amatora bavuga ko amatora ashobora gukererezwa kubera ibibazo byo kuyategura neza.

Kuva igihugu cya Repubulika Iharanira Demokarasi ya Congo cyabona ubwigenge nyuma y'imyaka irenga 55, nta na rimwe cyari cyagira ihererekanya ry'ubutegetsi rinyuze mu ituze.