Amatora ya Amerika 2016: Clinton na Trump barahanganira mu kiganiro cya nyuma

Trump na Clinton Uwufise ububasha kw’isanamu Getty/Reuters
Image caption Ikiganiro mpaka cya gatatu ai nacyo cya nyuma kirabera muri leta ya Nevada

Hillary Clinton na Donald Trump barahangana mu kiganirompaka cya nyuma i Las Vegas mu myiteguro y'amatora ya perezida wa Amerika yaranzwe no gushyamirana gukomeye.

Imibare y'ibyiyumviro by'abaturage bita "Polls" yerekana ko Bwana Trump ari gutsindwa mu ma leta akomeye cyane mu matora nyuma y'urutonde rw'ibirego bishingiye ku gitsina.

Ariko Madamu Clinton ntakunzwe cyane kandi yongeye kwandikwa nabi mu binyamakuru kubera ikoresha rye rya emails.

Abanyamerika benshi bazatora ku itariki ya 8/11/2016.

Ababarirwa mu ma miliyoni bari buze kuba bareba ikiganiro ku mateleviziyo yabo, kirabera muri Kaminuza ya Nevada iri mu mujyi wa Las Vegas kigatangira saa 21:00 ku isaha yo muri Amerika (Saa 01:00 ku isaha mpuzamasaha ya GMT). Ikiganiro kiraza kuba kiyobowe na Chris Wallace ukora kuri televiziyo ya Fox News.

Abakandida bombi barajya impaka ku ngingo esheshatu: umwenda w'igihugu, ubwisungane mu buzima n'inyungu zabwo, abimukira, ubukungu, Urukiko rw'Ikirenga, ibijyanye na politike mpuzamahanga ndetse n'uburyo biteguye kuba perezida.

Bwana Trump yahuye n'ibibazo by'abantu bo mu ishyaka rye ry'Abarepubulikani banze kumushyigikira nyuma y'ihishurwa ry'amashusho amwumvikanisha avuga amagambo y'urukozasoni no gukorakora abagore ku ngufu.

Mu minsi ishize, amaze igihe avuga ko amatora afifitse, avuga ko "azibwa nta kabuza" kandi ko hari ibibazo byo kuyiba ku buryo bwimbitse.

Iyi mvugo ye yatumye perezida Barack Obama amusubizanya imbaraga, avuga ko akwiye "kureka kubogoza".

Bwana Trump yatumiye mukuru wa perezida Obama basangiye se, Malik Obama- unamushyigikiye, nk'umushyitsi we mu kiganiro.

Yanatumiye Patricia Smith, ufite umuhungu wiciwe mu gitero cyagabwe kuri ambasade ya Amerika i Benghazi muri Libiya mu 2012, igihe Madamu Clinton yari minisitiri w'ububanyi n'amahanga.

Uwufise ububasha kw’isanamu Reuters
Image caption Indege z'abakandida bombi zari ziri ku kibuga cya Las Vegas

Ku ruhande rwe, Madamu Clinton yahisemo gucisha macye ari kwitegura ikiganiro.

Umuvugizi we yavuze ko Clinton yiteguye uburyo bwose Trump ari bukoreshe.

Madamu Clinton byitezwe ko ari buhatwe ibibazo ku bijyanye n'ubutumwa bwo kuri interineti bita emails bwibwe kuri konti y'umuntu ukuriye ibikorwa bye byo kwiyamamaza, bugashyirwa hanze n'igicumbi cy'amakuru y'amibano atangaza amabanga cyitwa Wikileaks.

Mu kiganiro cya kabiri, Bwana Trump yagaragaye mu kiganiro n'abanyamakuru ari kumwe n'abagore bashinja Bill Clinton imyitwarire idahwitse ishingiye ku gistina. Kuva icyo gihe, yashinje Madamu Clinton gufata imiti yongera imbaraga mbere y'ikiganirompaka.

Ariko abayobora ibikorwa byo kwiyamama ku ruhande rwa Clinton bavuga ko ari bugerageze gukomera ku murongo wo kuvuga ibijyanye na gahunda ye.

Abashyitsi be barimo umuherwe witwa Mark Cuban, unenga Trump bikomeye, na Meg Whitman, umuyobozi w'ikigo Hewlett Packard Enterprise, umwe mubarepubulikani bo ku rwego rwo hejuru bashyigikiye Clinton.