Abantu 11 bafashwe muri Maroc kubera urupfu rw’umucuruzi w’amafi

Imyigaragambyo Uwufise ububasha kw’isanamu Getty Images
Image caption Abaturage babarirwa mu bihumbi bakoze imyigaragamyo yamagana iyicwa ry'umucuruzi w'amafi.

Abategetsi muri Maroc baravuga ko abantu 11 batawe muri yombi ku birebana n'iyicwa ry'umucuruzi w'amafi mu mujyi wa Al Hoceima.

Urupfu rwa Mouhcine Fikri rwatumye haba imyigaragambyo mu mijyi myinshi y'icyo gihugu. Uwo mucuruzi w'amafi yagonzwe n'ikimodoka gitwara imyanda kuwa gatanu arimo kugerageza kwisubiza amafi ye yari yambuwe n'abapolisi.

Mu bantu 11 batawe muri yombi barimo batanu mu nzego z'ubutegetsi mu majyarugugu y'umujyi wa Al- Hoceima.

Babiri bakora muri minisiteri y'ubutegetsi bw'igihugu.

Itangazo ryasohowe n'ibiro by'umushinjacyaha mukuru w'igihugu riravuga ko baregwa ibyaha byo kwica ku buryo butagambiriwe no gukoresha inyandiko mpimbano.

Abakekwa bamaze kwitaba urwego rushinzwe iperereza.

Mouhcine Fikri yapfuye nyuma yo gusimbukira mu ikamyo itwara imyanda ashaka gukuramo ibiro 500 by'amafi, abategetsi bavuga ko atemewe kuroba muri iki gihe cy'umwaka.

Aya mafi yafashwe n'inzego z'umutekano ku cyambu, ziyamena mu ikamyo.

Umwe mu barobyi yanyukanyutswe n'ikimashini gikanda imyanda mu ikamyo arinda apfa ku wa Gatanu.