Intambara ngo yazahaje amavuriro muri Yemeni

Mu bitaro byo muri Yemeni Uwufise ububasha kw’isanamu EPA
Image caption Abantu byibura 7070 barishwe naho 36,818 barakomereka guhera muri 2015.

Ubushakashatsi bw'ishami rya ONU rishinzwe ubuzima ku isi bwasanze imirwano mu gihugu cya Yemeni imaze guhitana abantu barenga ibihumbi birindwi.

Abandi bagera ku bihumbi mirongo itatu na birindwi bakomerekeye muri iyo ntambara yatangiye mu ntangiriro z'umwaka ushize.

OMS ivuga kandi ko kimwe cya kabiri kirenga cy'ibigo by'ubuzima muri Yemeni ubu byafunze cyangwa ntibikora ku buryo bwuzuye.

Iyi ntambara yangije cyane ubukungu bw'iki gihugu kiri mu bikennye cyane ku isi kandi abaganga bahari baravuga ko abantu barimo kwicwa n'inzara.

Intambara imaze amezi 18 yogoza Yemeni ihuza inyeshyamba z'aba Houthi n'ingabo zishyigikiye Perezida Abdrabbuh Mansour Had zitewe inkunga n'ingabo z'amahanga zirangajwe imbere na Arabia Saudite.

Abantu bagera kuri miliyoni ebyiri ntabyo kurya bihagije bafite kandi barimo abana 370 000 bo bamerewe nabi cyane.