Trump niwe perezida mushya wa Amerika

Donald Trump Uwufise ububasha kw’isanamu PA

Akimara gutorwa yavuze ko azakorera abanyamerika bose kandi asaba igihugu gushyira hamwe

Nyuma yo gutsinda Hillary Clinton wo mu ishyaka ry'abademocrate, Bwana Trump yavuze ko za miliyoni nyinshi z'abanyamerika batoye ejo hazaza heza.

Ishyaka ry'abarepublicain rya Trump kandi ni naryo rigiye kugenzura sena n'inteko nshingamategeko.

Perezida ucyuye igihe Barack Obama yatumiriye Donald Trump muri White House ejo kuwa kane kugirango baganire ku ihererekanya ry'ubutegetsi.

Uwufise ububasha kw’isanamu AFP
Image caption Bill na Hillary Clinton

Hagati aho Hillary Clinton bahataniraga uwo mwanya yamushimiye iyo ntsinzi ye maze avuga ko yiteguye gukorana nawe mu izina ry'abanyamerika.

Yavuze ko yizeye ko azahirwa mu murimo we w'umukuru w'igihugu w'abanyamerika bose.

Abayobozi b'ibihugu hirya no hino ku isi, bavuze ko bagiye gukorana na perezida mushya wa Amerika nubwo bwose hari abafite impungenge mu Burayi ku birebana n'amahinduka ashobora kuba ku bintu bari bamenyereye mu mubano na Amerika.

Perezida Putin w'Uburusiya yizeye ko umubano hagati y'igihugu cye na Amerika ugiye kumera neza.

Ashimishijwe cyane n'amagambo Donald yavuze k'umuryango wo gutabarana wa OTAN Amerika ihuriweho n'uburayi - yibaza akamaro kawo.

Ubufaransa n'Ubudage byo bifite impungenge.

Birashimangira ko Ubumwe bw'uburayi bwarushaho gukomera.

Uwufise ububasha kw’isanamu Reuters
Image caption Abayoboke ba Hillary Clinton imbere ya hoteli i New aho yababwiriye ijambo.

Irani yo irasaba Trump kutazahagarika amasezerano icyo gihugu cyagiranye n'ibihugu by'ibihangange kuri gahunda yayo y'ingufu za nucleaire.

Hagati aho Perezida wa Mexique, Enrique Pena Nieto, yavuze ko afite ikizere ko umubano hagati y'igihugu cye na leta zunze ubumwe ushobora kurushaho kuba mwiza nyuma y'itorwa rya Donald Trump.

Ifaranga rikoreshwa muri icyo gihugu cya Peso, agaciro karyo kaguye cyane kubera ubwoba ko Trump azashyira mu bikorwa gahunda ye yo kubaka urukuta ku mupaka w'icyo gihugu