Misiri yafunze umuyobozi w'ihuriro ry'abanyamakuru

Yehia Qallash yagiye mu myigaragambyo imbere y'ibiro by'ihuriro ry'abanyamakuru i Cairo muri uyu mwaka Uwufise ububasha kw’isanamu AFP/Getty Images
Image caption Yehia Qallash yagiye mu myigaragambyo imbere y'ibiro by'ihuriro ry'abanyamakuru i Cairo muri uyu mwaka

Umuyobozi w'ihuriro ry'abanyamakuru mu Misiri n'abagenzi be babiri bakatiwe gufungwa imyaka ibiri kubera "guhishira abashakwa n'ubucamanza".

Urukiko i Cairo rwanemereye Yehia Qallash n'abari ku buyobozi bw'urugaga Gamal Abdel Rahim na Khaled al-Balshy kwishyura amadolari 630 y'ingwate mu gihe hategerejwe ubujurire.

Mu kwezi kwa Gatanu, polisi yagabye igitero ku cyicaro cy'ihuriro ry'abanyamakuru mu murwa mukuru, ita muri yombi abanyamakuru babiri ku ruhande rutavuga rumwe na leta.

Abo babiri bari basabye ubuhingiro mu nyubako bahunga impapuro zabashakishaga kugira ngo batabwe muri yombi.

Baregwa kugumura abigaragambya bamaganaga icyemezo cy'abategetsi ba Misiri cyo kwegurira Arabiya Sewudite ibirwa bibiri biri mu nyanja itukura.

Abanenga perezida Abdul Fattah al-Sisi bamaganye icyi cyemezo bavuga ko kidakurikije itegekonshinga kandi ko kitarimo umucyo.

Abanyamakuru bo mu Misiri n'abanyamahanga batawe muri yombi igihe gito abandi barafungwa muri uyu mwaka, igihe bataraga inkuru y'imyigaragambyo yamagana icyemezo cya Bwana Sisi.

Bwana Sisi, wacecekesheje abatavuga rumwe na leta kuva yahirika ubutegetsi bwa perezida watowe, Mohammed Morsi, binyuze mu nzira za gisirikare nyuma y'imyigaragambyo yo muri 2013, yavuze ko, "shitani" yari gucura umugambi kugira ngo ihungabanye leta.