Nyamugigima yahitanye benshi muri Indonesia

Umusigiti wabomotse mu karere ka Pidie, Indonesia Uwufise ububasha kw’isanamu AFP/Getty Images
Image caption Inzu nyinshi harimwo imisigiti zabomotse

Nyamugigima ikomeye yishe abantu 24 yonona n'ibintu vyinshi mu ntara ya Aceh mu gihugu ca Indonesia.

Abategetsi bavuga ko abantu benshi baguweko n'ibihome vy'inzu zabomotse.

Iyo nyamugigima ifise ibipimo vya Richter 6.4 yadutse hagufi y'igisagara ca Sigli mw'izinga rya Sumatra, aho amazu menshi yabomaguritse.

Ikigo kijejwe kugenzura ikirere muri Indonesia kivuga ko ata bwoba ko hashobora kuza igihuhusi.

Mu mwaka wa 2004, intara ya Aceh yarononekaye cane bivuye ku gihuhusi catewe na nyamugigima nini.

Abantu 120.000 ni bo bahasize ubuzima muri iyo ntara.

Ikigo kijejwe ubutaka muri Amerika kivuga ko iyo nyamugigima yadutse mu gihe ca 11:03 mu gitondo muri Indonesia (22:03 GMT) ku musi wa kabiri ku birometero 17.2 uja mu kuzimu.

Said Mulyadi, icegera c'uwurongoye akarere ka Pidie Jaya, kakozweko cane n'ico kinyamugigima, yabwiye igisata ca BBC muri Indonesia ko igitigiri c'abapfuye gishobora kwongerekana.

Uwufise ububasha kw’isanamu AFP
Image caption Abategetsi bavuga ko bishoboka ko hataduka igihuhusi
Uwufise ububasha kw’isanamu AFP
Image caption Abajejwe gutabara bariko bararondera abarokotse
Uwufise ububasha kw’isanamu AFP/Getty Images
Image caption Abategetsi batinya ko abapfuye bashobora kwongerekana kuko hari abaguweko n'ibisigarira vy'amazu