Ubushinwa: Amagambo ya Trump kuri politike y'Ubushinwa na Taiwani ashobora kubangamira amahoro

Umuvugizi wa minisiteri y'ububanyi n'amahanga An Fengshan (mu ifoto) yatanze impuruza ko politike yo kudafata Taiwani nk'igihugu kigenga ari yo nkingi ya mwamba y'amahoro muri ako gace Uwufise ububasha kw’isanamu AP
Image caption Umuvugizi wa minisiteri y'ububanyi n'amahanga An Fengshan (mu ifoto) yatanze impuruza ko politike yo kudafata Taiwani nk'igihugu kigenga ari yo nkingi ya mwamba y'amahoro muri ako gace

Ubushinwa buravuga ko amagambo ya Trump ku kubaho k'Ubushinwa bumwe "abangamiye amahoro muri Taiwan"

Igihugu cy'Ubushinwa cyaburiye ubuyobozi bushyashya bw'Amerika ko igerageza iryo ari ryo ryose rigamije kubangamira Ubushinwa nk'igihugu kimwe rishobora kugira ingaruka ku mahoro muri Tayiwani.

Umuvugizi wa leta y'Ubushinwa yavuze ko ukwivanga kw'Amerika gushobora no kwangiza umubano wari utangiye kubyuka hagati y'Amerika n'Ubushinwa.

Muri gahunda y'Ubushinwa bumwe, Amerika igirana umubano wemewe n'Ubushinwa aho kuwugirana n'ikirwa cya Tayiwani, Ubushinwa bufata nk'intara yabwitandukanyijeho.

Ariko Donald Trump, Perezida watowe muri Amerika, yagaragaje impungenge mu gukomeza gukurikiza iyo gahunda.

Bwana Trump yamaze kurakaza Ubushinwa yitaba telefone ya Perezida Tsai Ing-wen wa Tayiwani, ndetse akabitangaza ku rubuga nkoranyambaga rwa tuwita.

Ku wa mbere, Ubushinwa bwavuze ko "buhangayikishijwe bikomeye" n'amagambo ya Bwana Trump, ndetse busaba ko habaho kwigengesera kuri icyo kibazo.

Ariko kuri uyu wa gatatu, An Fengshan, umuvugizi w'Ubushinwa ku bibazo birebana na Tayiwani, yongeyeho kuburira Amerika ku ngaruka zindi zikomeye cyane.

Yagize ati: "Gukurikiza gahunda y''Ubushinwa bumwe' ni ishingiro rya politiki y'umubano uri gutera imbere hagati y'Ubushinwa n'Amerika, kukaba n'ipfundo ry'amahoro n'umutuzo mu kirwa cya Tayiwani."

Yongeyeho ko "Niba rero iri shingiro rivangiwe cyangwa rigahungabana, rero umubano ntamakemwa kandi urambye hagati y'Ubushinwa n'Amerika ntiwaba ukibayeho, kandi amahoro n'umutuzo mu kirwa cya Tayiwani nabyo bizagirwaho ingaruka cyane."

Ayo magambo ya Bwana An, aje mu gihe Harry Harris, umusirikari ukomeye ukuriye ingabo z'Amerika zikambitse mu nyanja ya Pasifika, yasezeranyije ko Amerika izakomeza kubangamira "imyitwarire y'ubwiyemezi n'urugomo" ya Leta y'Ubushinwa mu gice cy'inyanja y'amajyepfo y'Ubushinwa.

Mu kiganiro n'ikigo cyo muri Australiya gikora ubushakashatsi cya Lowy mu murwa mukuru Sydney, Harris yagize ati: "Ntituzemera ko ahantu hasangiwe hafungwa n'umuntu umwe, tutitaye ku bwinshi bw'ibibuga byubatswe ku bintu bitari karemano mu nyanja y'amajyepfo y'Ubushinwa."

Yongeyeho ati: "Tuzabyemera aho tubishoboye ariko tuzitegura no kurwana aho tugomba kubikora."

Ubushinwa bumaze igihe bukora ibirwa bitari karemano bishobora kugwaho indege za gisirikari mu karere.

Bunatsimbaraye ku kwita icyabwo hafi igice cyose gikungahaye cy'inyanja yo mu majyepfo y'Ubushinwa, nubwo bwose ibihugu bituranyi byabwo byo mu majyepfo y'uburasirazuba bw'Aziya bitabyemera.

Amerika ikomeje kutemeranya n'Ubushinwa kuri iyo ngingo, ndetse yohereje ubwato bwayo bw'intambara muri icyo gice mu kubahiriza uburenganzira bwo gukoresha ayo mazi.