Ibitero bya IS i Baghdad

Aho igitero cyabereye Uwufise ububasha kw’isanamu AFP
Image caption Ibyo bisasu byaturitse mu gitondo cyo kuwa gatandatu igihe isoko ryari ryuzuye abantu.

Abantu byibura makumyabiri baguye mu bitero by'ibisasu bibiri byaturikiye mu isoko ryari ryuzuye abantu mu murwa mukuru wa Irak, Baghdad.

Abarenga mirongo itanu bakomerekeye muri icyo gitero cyabereye mu gace ka Sinak kikangiza n'amaduka.

Igipolisi kiravuga ko habanje guturika igisasu cyari cyatezwe iruhande rw'umuhanda hafi y'iduka rigurisha ibyuma by'imodoka.

Mu nyuma umwiyahuzi yiturikirijeho igisasu mu bantu bari baje kureba ibyabaye.

Umutwe wiyita Leta ya Kiyislamu - IS - uravuga ko babiri mu barwanyi bawo aribo bagabye ibyo bitero bambaye udukoti tw'abiyahuzi.

Umutwe wa IS umaze igihe ugaba ibitero hafi buri munsi mu murwa mukuru wa Irak mu gihe igisirikare cya leta gikomeje kugerageza kwisubiza umujyi wa Mosul uri mu maboko y'uwo mutwe ukaba uri mu majyaruguru y'igihugu.

Mu kwezi kwa cumi na kumwe, abantu 77 barimo abayislamu b'abashia bari mu rugendo rw'idini baguye mu gitero cy'ibisasu byatezwe mu ikamyo naho mu kwezi karindwi abantu 281 bagwa mu gitero cyagabwe ahantu hari amaduka muri Iraq.

Umutwe wa IS ibyo bitero byombi wivugiye ko ariwo wabigabye.