Iperereza muri Amerika rirashinja Putin

Uwufise ububasha kw’isanamu EPA/AP
Image caption James Clapper (ibumoso) yavuze ko icyatumye Perezida Putin yivanga mu matora kizasobanurwa mu cyumweru gitaha

Umukuru w'inzego zishinzwe iperereza muri Leta zunze ubumwe za Amerika, General James Clapper, yiyemeje gusobanura impamvu Uburusiya bushinjwa kwivanga mu matora y'umukuru w'igihugu muri Amerika.

Bwana Clapper yavuze ko Perezida Vladmir Putin yategetse ko emails z'ishyaka ry'abademokarate zinjirwamo mu buryo butemewe n'amategeko.

Icyatumye abitegeka ngo kizasobanurwa mu cyumweru gitaha.

Ariko James Clapper yirinze kuvuga ko iki ari igikorwa cyatuma ibihugu byombi byinjira mu ntambara.

Uburusiya buhakana bwivuye inyuma ibyo bushinjwa na Amerika ariko leta y'iki gihugu ntibyayibujije kubufatira ibihano.

Icyegeranyo ku kuntu amahanga yivanze mu matora ya Amerika cyashyikirijwe Perezida Barack Obama.

Uwufise ububasha kw’isanamu AP
Image caption Donald Trump n'umugore we

Perezida watowe Donald Trump azabwirwa ku biri muri icyo cyegeranyo kuwa gatanu.

Ibiri muri icyo cyegeranyo bitari ibanga bizatangarizwa rubanda mu cyumweru gitaha.

Abayobozi bo hejuru b'inzego zishinzwe iperereza muri Amerika barimo gutanga ubuhamya mu kanama gashinzwe ingabo muri sena karimo gukora iperereza kuri uko kwivanga mu matora kw'amahanga.

Uko babibona nuko Uburusiya bwivanze mu matora kugira ngo bufashe Donald Trump gutsinda Hillary Clinton.

Uwufise ububasha kw’isanamu AP
Image caption Obama ashaka ko amakuru menshi y''ubutasi kuri iki kibazo atangarizwa rubanda ariko inzego z'iperereza zirashaka kurinda abaziha amakuru.

Mu buhamya muri Sena, abategetsi baravuga ko Uburusiya bufite gahunda ikomeye cyane yo kwinjira muri za mudasobwa ku buryo butemewe n'amategeko ibangamiye inyungu zitandukanye za Leta zunze Ubumwe za Amerika.

Ubutegetsi bwa Obama bwirukanye muri Amerika abadipolomate 35 b'Uburusiya kandi bufunga ibigo bibiri byakoreshwaga n'inzego zishinzwe iperereza z'Uburusiya.