Imyigaragambyo y'abaganga irakomeje muri Kenya

Imyigaragambyo y'abaganga muri Kenya Uwufise ububasha kw’isanamu AP
Image caption Abaganga batangiye imyigaragambyo mu kwezi gushize.

Abaganga bari bahagaritse akazi muri Kenya bongeye kwanga inyongera y'umushahara ya 40 ku ijana leta yashakaga kubaha.

Ibi rero byatumye imyigaragambyo bamazemo ukwezi kose ikomeza.

Ishyirahamwe ry'abaganga riravuga ko iyo nyongera bayanze kubera ko itari ikwiriye rubanda ngo kubera ko batari mu myigaragambyo kubera inyungu zabo gusa.

Abaganga baravuga ko bashaka ko bagira amategeko meza abagenga ariko na none bagashaka ko amavuriro ahabwa imiti n'ibikoresho bihagije.

Barashaka kandi ko leta iha akazi abandi baganga kandi ikagena ingengo y'imari yo kubahugura no gukora ubushakashatsi.

Abaganga bo muri Kenya batangiye imyigaragambyo mu kwezi gushize basaba ko amasezerano bumvikanye na leta mu mwaka wa 2013 yo kuzamura imishahara yabo inshuro 300 ku ijana ashyirwa mu bikorwa.

Leta iravuga ko idafite ubushobozi bwo kubona ayo mafaranga ariko hari ibindi yabemereye.

Mu ibyo bemerewe bishya harimo kongera umuganga uhembwa make amadolari 600 ku kwezi maze umushahara we ukagera ku madolari 2,000 ku kwezi.

Kubera iyo myigaragambyo, ubuvuzi kabuhariwe nko kubaga byarahagaze mu mavuriro menshi ya leta.

Ariko abandi bakozi mu buzima, nk'abaforomo n'abafata ibimo baracyavura.

Abaganga binzobere bitabazwa mu ndwara zikomeye nibo bavura abarwayi mu mavururo yabo bwite.