FIFA yongereje igitigiri c'ibihugu bizokinira igikombe c'isi

Ujerumani Uwufise ububasha kw’isanamu Getty Images
Image caption Ubudagi bwaratsinze igikombe c'isi muri Brezil mu 2014

Ishirahamwe ry'umupira w'amaguru kw'isi FIFA ryemeje umugambi wo kwongereza igitigiri c'imigwi izokinira igikombe c'isi gushika ku 48.

Uwo mugambi uzotangura gushirwa mu ngiro mu nkino z'igikombe c'isi zo mu 2026, ukazogirira akamaro cane imigabane ya Afrika na Asia.

Uwo mugambi washikirijwe kandi ushigikirwa n'umukuru wa Fifa Gianni Infantino wemejwe n'abari bahari bose mu gisagara ca Zurich ku musi wa kabiri.

Bubaye ubwa mbere hongerezwa igitigiri c'ibihugu bija mu gikombe c'isi kuva mu 1998.

Infantino w'imyaka 46, yasubiriye Sepp Blatter nk'umukuru wa FIFA mu kwezi kwa kabiri mu 2016 yari yiyamamaje avuga ko azokwongereza ibihugu bizoja mu gikombe c'isi.

Ubwa mbere yari yasavye ko hoba imigwi 40, iciyumviro cari cazanye n'uwahoze ari umukuru wa UEFA ico gihe, Michel Platini mu 2013, imbere y'uko ahindura aho ahagaze ashigira ko yoba imigwi 48.

Uwufise ububasha kw’isanamu Getty Images
Image caption Prezida wa Fifa Gianni Infantino ashaka ko haba ibihugu 48 bija mu gikombe c'isi

Muri uwo mugambi washikirijwe na Infantino ubu, inkino zikwiyongera kuva kuri 64 gushika ku 80, ariko ariko urukino rwa nyuma ruzokinwa mu misi 32 nk'uko bimeze ubu.

Nta gihugu kizokina inkino zirenga indwi, nk'uko bisanzwe biri ubu.

Ariko bishobora gushika ko hazoterwa penaliti hagati y'ibihugu bizonganya mu migwi birimwo.

Kahise k'ingene hagiye harahinduka ibintu mu gikombe c'isi

Igikombe c'isi Imigwi
1930 Uruguay 13
1934 Ubutaliano 16
1950 Brezil 13
1954 Ubuswisse 16
1958 Swede 16
1974 Ubudagi bwo mu burengero 16
1982 Espagne 24
1986 Mexique 24
1998 Ubufaransa 32

Ibindi bisa n’ibi

Ibindi kuri iyi nkuru