Iteka rya Trump ryamaganywe

Ku kibuga cya JFK Uwufise ububasha kw’isanamu Getty Images
Image caption Ikibuga cy'indege cya JFK i New York kiri mu hantu habereye imyigaragambyo yamagana iteka rya Trump

Impirimbanyi z'uburenganzira bw'ikiremwa muntu muri Amerika zishimiye intsinzi mu rukiko mu rubanza baregagamo leta kubera icyemezo cya Perezida Donald Trump cyo gukumira cyangwa kubuza kwinjira muri Amerika abantu bakomoka mu bihugu bimwe byiganjemo abayisilamu.

Umucamanza wo muri leta ya New York yategetse ko abantu bafungiwe muri Leta zunze ubumwe za Amerika kubera iteka Perezida Trump yasohoye kuwa gatanu batirukanwa mu gihugu.

Umuryango uharanira uburenganzira bw'abaturage muri Amerika wavuze ko iki cyemezo cy'urukiko cyerekanye ko inkiko ari imyugariro ikomeye ya demokarasi muri Amerika.

Uwufise ububasha kw’isanamu Getty Images
Image caption Icyemezo cya Trump cyamaganywe cyane n'imiryango iharanira uburenganzira bw'ikiremwamuntu.

Imyigaragambyo yamagana icyemezo cya Trump yabaye ku bibuga by'indege hirya no hino mu gihugu.

Hagati aho, Perezida Trump yashimangiye ako amategeko mashya arimo ashyirwa mu bikorwa neza.

Yavuze ariko ko ayo mategeko atagamije gukumira abayisilamu.

Hagati aho iteka rya Trump rikomeje kwamaganwa mu mahanga.

Umukuru wa leta y'Ubudage, Angela Merkel, avuga ko nta wakwitwaza intambara yo kurwanya iterabwoba ngo akekere ubusa abantu kubera inkomoko yabo cyangwa ukwemera kwabo.

Ntibishobora gukina mu cuma cawe
Imyigaragambyo i New York yamagana iteka rya Trump ku mpunzi zo muri Syria.

Ministri w'ububanyi n'amahanga w'Ubwongereza, Boris Johnston , yavuze ku rubuga rwe rwa Twitter ko gushyira igisebo ku bantu kubera ubwenegihugu bwabo atari byo kandi ko bizana amacakubiri.

Umukuru w'umujyi wa Londres, Sadiq Khan akaba n'umuyisilamu, yavuze ko icyo cyemezo cya Trump giteye isoni kandi ko kirimo ubugome.