Ibihano Uburayi bwafatiye Zimbabwe byagumyeho

Mugabe Uwufise ububasha kw’isanamu AFP
Image caption Perezida Mugabe yujuje imyaka 93 y'amavuko

Mu gihe Perezida Robert Mugabe wa Zimbabwe yujuje kuri uri wa kabiri imyaka 93 avutse, umuryango w'ubumwe bw'Uburayi wafashe icyemezo cyo gukomeza ibihano byo mu rwego rw'ubukungu wafatiye icyo gihugu.

Ibi bihano birimo gukumira ingendo, gufatira umutungo no kubuza icuruzwa ry'intwaro hagati y'uwo muryango na Perezida Mugabe,umugore we n'ibigo bikora ubucuruzi bwerekeranye n'intwaro.

Ibi bihano bizakomeza gushyirwa mu bikorwa kugeza ku itariki ya 20 z'ukwa kabiri mu mwaka utaha ubwo umuryango w'ubumwe bw'Uburayi uzongera kubyigaho.

Hashize imyaka irenga 10 uyu muryango ufatiye Zimbabwe ibihano uyishinja kutubahiriza uburenganzira bw'ikiremwa muntu.

Hari mu mwaka wa 2002 nyuma yaho leta ya Zimbabwe itangiye kwirara mu masambu y'abahinzi b'abazungu, hakanavugwa uburiganya mu matora ndetse n'ibikorwa by'urugomo byibasiye abatavuga rumwe na leta n'impirimbanyi z'uburenganzira bw'ikiremwamuntu.

Perezida Mugabe avuga ko Ubwongereza buri inyuma y'ifatwa ry'ibihano byafatiwe igihugu cye muri gahunda yo gushaka kumuvana ku butegetsi.