Afurika yepfo ngo ntiyubahirije amategeko mu kuva muri ICC

Perezida Zuma Uwufise ububasha kw’isanamu Getty Images

Urukiko rukuru rwo muri Afurika yepfo rwavuze ko icyemezo cya leta y'icyo gihugu cyo kuva mu rukiko mpuzamahanga mpanabyaha rwa ICC kinyuranyije n'itegekonshinga.

Urwo rukiko rwavuze ko leta yagombaga kubanza kubisaba inteko nshingamategeko.

Afurika yepfo, Uburundi na Namibia biri mu bihugu bihugu byatangaje mu mwaka ushize ko byivanye mu rukiko rwa ICC bivuga ko urwo rukiko rubogama rwibasira abanyafurika.

Ikindi muri ibyo bihugu byafashe icyemezo cyo kuva muri urwo rukiko ni Gambia.

Ariko kubera ubutegetsi bushya muri icyo gihugu perezida mushya yavuze ko kitakiruvuyemo.

Ishyaka ritavuga rumwe na leta rya DA (Democratic Alliance) muri Afurika yepfo niryo ryari ryaratanze ikirego rivuga ko leta yagombaga kubanza kubicisha mu nteko nshingamategeko.

Uwufise ububasha kw’isanamu Reuters
Image caption Omar al-Bashir (hagati mu ifoto)

Urukiko rwahise rutegeka leta guhagarika icyo gikorwa cyo kuva muri ICC.

Ariko minisitiri w'ubucamanza, Michael Masutha, yavuze ko leta igifite gahunda yo kuva muri urwo rukiko.

Yongeyeho ko leta irimo kwiga icyo igiye gukora harimo no kuba yajuririra iki cyemezo imaze gusoma neza umwanzuro wose w'urukiko rukuru.

Icyemezo cya Afurika yepfo cyo kuva mu rukiko rwa Icc cyafashwe nyuma yaho abategetsi b'icyo gihugu bangiye guta muri yombi umukuru wa Sudani, Omar al-Bashir, wari waje mu nama y'umuryango w'ubumwe bwa Afurika i Johanesbourg muri 2015.

Umukuru wa Sudani ashakishwa n'urukiko rwa ICC rumukekaho ibyaha byibasira inyoko muntu.