Kamarampaka muri Turukiya: Imvururu nyuma yo kwirukana minisitiri wa Turukiya

Fatma Betul Sayan Kaya avugana na polisi y'Ubuholandi Uwufise ububasha kw’isanamu Reuters
Image caption Fatma Betul Kaya Sayan yanditse ubutumwa bugufi kuri Twitter igihe yari ari kwirukanwa na polisi

Igipolisi gishinzwe kurwanya imyigaragambyo cyahanganye n'abigaragambya i Rotterdam, nyuma y'ikibazo cya dipolomasi cyanatumye minisitiri wa Turukiya yirukanwa mu gihugu.

Igipolisi cyakoresheje amafarasi kinamisha amazi menshi mu gutatanya abantu bagera ku 1.000 bari hanze y'ibiro bihagarariye Turukiya mu Buholandi.

Umuminisitiri wo Turukiya yageragezaga kubona inkunga y'amajwi y'abanya Turukiya baba mu Buholandi kuri kamarampaka iteganyijwe mu kwezi gutaha.

Guverinoma y'Ubuholandi ivuga ko ibyo bikorwa byakongeza ubushyamirane iminsi micye mbere y'amatora ateganyijwe mu Buholandi.

Fatma Betul Sayan Kaya, minisitiri w'umuyango muri Turukiya yari yageze mu gihugu aje mu modoka ku wa Gatandatu yitegura ibi bikorwa byo gushyigikira kamarampaka.

Ariko yabujijwe kwinjira ku biro bihagarariye Turukiya i Rotterdam.

Madamu Kaya yahise ajyanwa ku mupaka w'Ubudage aherekejwe na polisi, nk'uko byemejwe ku Cyumweru mu gitondo na minisitiri w'intebe w'Ubuholandi Mark Rutte.

Uwufise ububasha kw’isanamu Reuters
Image caption Abantu bagera ku 1.000 bagiye imbere y'ibiro bihagarariye Turukiya i Rotterdam kwigaragambya

Mbere y'aho, Ubuholandi bwari bwaburijemo minisitiri w'ububanyi n'amahanga Mevlut Cavusoglu kwinjira mu gihugu akoresheje indege. Ubu yahise ajya mu mujyi wa Metz mu Bufaransa aho ari bugeze ijambo ku bamushyigikiye kuri icyi Cyumweru.

Uwufise ububasha kw’isanamu AFP
Image caption Perezida Erdogan arizera gutsinda kamarampaka izamwongerera ububasha

Ku rukuta rwe rwa facebook, Bwana Rutte yavuze ko kugerageza gushaka igisubizo ku kibazo gitandukanya ibihugu bisa n'ibidashoboka.

Madamu Kaya yanditse kuri Twitter agira ati:

"Isi igomba gufata umwanzuro kuri iki gikorwa cy'ubufashisite mu izina ry'ubwisanzure! Iyi myitwarire ku muminisitiri w'umugore ntishobora kwemerwa."