uruhinja rwari rwashimuswe muri Afurika y'Epfo rwabonetse ari rutaraga

Siwaphiwe Mbambo yashimuswe igihe imodoka ya nyina yatwawe i Durban Uwufise ububasha kw’isanamu South African Police Service
Image caption Siwaphiwe Mbambo yashimuswe igihe imodoka ya nyina yatwawe i Durban

Uruhinja rw'ukwezi rwari rwashimutiwe mu gisa n'ubujura bw'imodoka muri Afurika y'Epfo ku wa Gatanu twabonetse nta kibazo rufite.

Polisi yahagaritse imodoka hagati y'umujyi wa Durban na Pietermaritzburg ahayinga saa sita z'ijoro ku wa Gatandatu isangamo Siwaphiwe Mbambo. Abantu batatu batawe muri yombi, polisi yavuze ko umwe muri bo ari nyina w'umwana.

Abakekwa babiri bivugwa ko bari bashimushe imodoka ye, bayitwarana n'uruhinja.

Ibi byateye impagarara mu itangazamakuru umwana atangira gushakishwa. Abapolisi bagera ku 100 baritabazwa.

Polisi yari yatahuye imodoka yo mu bwoko bwa Toyota Yaris ya nyina w'uruhinja itari irimo umuntu ahagana saa 15:00 ku wa Gatanu.

Ariko umuvugizi w'urwego rw'umutekano, Kyle van Reenen, yavuze ko intebe y'umwana yari yakuwe mu modoka.

Uwufise ububasha kw’isanamu Marshall Security/Facebook
Image caption Imodoka yo mu bwoko bwa Toyota Yaris y'umweru yasanzwe nta muntu uyirimo

Umuvugizi wa polisi mu ntara ya KwaZulu Natal Lt-Col Thulani Zwane yemeje amakuru y'uko uruhinja rwabonetse saa sita z'ijoro ku wa Gatandatu.

Itangazamakuru ryo muri Afurika y'Epfo ryakwirakwije amafoto y'uruhinja ku mbuga zaryo nyuma yo kuboneka.

Umwana yajyanywe mu kigo kimwitaho.

Iri shimutwa ry'umwana ryatangaje abanya Afurika y'Epfo bamwe bajya ku rubuga nkoranyambaga rwa Twitter basaba uwaba afite amakuru yatuma umwana abonerwa irengero, kuyatanga.

Kwiba imodoka muri Afurika y'Epfo biramenyerewe, ndetse bamwe bashyira utwuma mu binyabiziga tugenzura aho imodoka zabo ziherereye.

Umwaka ushize, ibibazo by'ubushimusi byazamutse ku kigero cya 14.3% ugereranyije n'umwaka wabanje, bisobanuye ko ku mpuzandengo imodoka 40 zibwe buri munsi ugendeye ku mibare ya vuba.