Umuryango w'ubumwe bw'Uburayi umaze imyaka 60

Papa Fransisiko (hagati n'ikanzu yera) ari kumwe n'abayobozi b'ibihugu bigize umuryango w'ubumwe bw'Uburayi. Uwufise ububasha kw’isanamu Getty Images
Image caption Papa Fransisiko (hagati n'ikanzu yera) ari kumwe n'abayobozi b'ibihugu bigize umuryango w'ubumwe bw'Uburayi.

Abakuru b'ibihugu 27 bigize umuryango w'ubumwe bw'Uburayi - hatarimo Ubwongereza - bari i Roma mu Butaliyani mu muhango wo kwibuka imyaka 60 ishize uwo muryango umaze ushinzwe.

Hateganijwe imyigaragambyo y'abashyigikiye n'abadashyigikiye uwo muryango.

Umutekano uracunzwe cyane nyuma y'igitero cy'iterabwoba cyabaye mu mujyi wa Londres kuwa gatatu ushize.

Ministri w'intebe w'Ubutaliyani - Paolo Gentiloni - yasabye abayobozi b'ibihugu bigize umuryango w'ubumwe bw'Uburayi kugira imbaraga zo kwongera ubutwererane.

Ubwongereza ntabwo buri muri iyo nama ibera i Roma.

Kuwa gatatu niho ministri w'intebe w'Ubwongereza - Theresa May - azatangiza gahunda yo kuva muri uwo muryango.

Umushumba wa Kiliziya Gatolika, Papa Fransisiko, yakiriwe abo bayobozi bakuru i Vatican.

Mu ijambo yababwiye yavuze ko imibiri yose ishobora gupfa iyo itarebye imbere maze asaba uwo muryango gutegurana ingufu nshya ejo hazaza.

Amasezerano yashyizeho umuryango w'ubumwe bw'Uburayi yashyizweho umukono rugikubita n'ibihugu bitandatu aribyo: Ububirigi, Ubufaransa, Ubutaliyani, Luxembourg, Ubuholandi n'icyari Ubudage bw'uburengerazuba.