Venezuela yasabye ONU ubufasha

Perezida Maduro Uwufise ububasha kw’isanamu Reuters
Image caption Abatavuga rumwe na leta bavuga ko imitegekere mibi ya Maduro ariyo yatumye ibintu bimera nabi.

Perezida wa Venezuela, Nicolas Maduro, yasabye ONU gufasha igihugu cye kongera imiti gikoresha.

Bwana Maduro yavuze ko ONU ifite ubuhanga bwo gutuma imiti itabura mu gihugu.

Ishyirahamwe ry'ubuvuzi muri Venezuela riherutse kuvuga ko ibitaro bisigaranye hasi ya 5% by'imiti bikeneye.

Perezida Maduro avuga ko byatewe n'intambara yo mu rwego rw'ubukungu leta ye yashowemo ndetse n'igwa ry'ibiciro bya peteroli ku isi.

Yabwiye abaturage be ko yasabye ONU ubufasha muri gahunda yo kubonera umuti ibibazo by'ubukungu n'imbonezamubano bibangamiye abaturage b'igihugu cye.

Abatavuga rumwe n'ubutegetsi baravuga ko ubutegetsi bubi bwe aribwo bwatumye ibintu bimera nabi.

Ibura ry'ibiribwa n'ibindi bintu bikenerwa cyane bituma abaturage bo muri Venezuela birirwa batonze imirongo miremire kugira ngo babashe kubibona.

Abanyamakuru baravuga ko kubona Perezida Maduro yiyemera ko igihugu cye gikeneye inkunga iturutse hanze ari ikimenyetso gikomeye ko ibintu bimeze nabi mu gihugu nubwo bwose kiri mu bikize cyane kuri peteroli ku isi.