Abasirikare barenga 100 nibo bahitanywe n'abatalibani

Abasirikare barinze ikigo cya Mazar-e-Sharif nyuma y'igitero Uwufise ububasha kw’isanamu Reuters
Image caption Abasirikare barinze ikigo cya Mazar-e-Sharif nyuma y'igitero

Minisiteri y'ingabo muri Afghanistani yatangaje ko abasirikare barenga ijana bishwe cyangwa bagakomerekera mu gitero intagondwa z'abatalibani zagabye ku kigo cya gisirikare kiri hafi y'umujyi wa Mazar-i-Sharif kuwa gatanu.

Amakuru yari yatangajwe mbere yavugaga ko barenze kure uwo mubare. Hari kandi n'intagondwa zitavuzwe umubare nazo zaguye muri icyo gitero.

Umuvugizi w'igisirikare - Nasratullah Jamshidi - yavuze ko igitero cyagabwe igihe abasirikare barimo bava mu masengesho yo kuwa gatanu mu musigiti uri muri icyo kigo.

Hari n'abandi basirikare bibasiwe n'icyo gitero igihe bari mu nzu y'uburiro yo muri icyo kigo.

Image caption Icyo gitero cyagabwe ku kigo cya gisirikare kiri hafi y'umujyi wa Mazar-e-Sharif

Abatalibani batangaje ko abarwanyi babo baturikije ikintu kiturika bityo ngo bituma abiyahuzi babo babasha kwinjira mu kigo.

Leta ya Afghanistani ishyigikiwe n'ibihugu byo mu Burayi na Amerika iri mu ntambara ndende n'abatalibani n'indi mitwe y'intagondwa.