Nijeriya: Perezida Buhari arasabwa gufata ikiruhuko cy'uburwayi

Perezida Muhammadu Buhari yamaze igihe yivuriza mu Bwongereza Uwufise ububasha kw’isanamu AFP
Image caption Perezida Muhammadu Buhari yamaze igihe yivuriza mu Bwongereza

Itsinda ry'abanya Nijeriya bakomeye ryasabye perezida Muhammadu Buhari w'imyaka 74 gufata ikiruhuko cy'uburwayi, nyuma y'ibibazo bijyanye n'ubuzima bwe.

Iri tsinda rivuga ko hari "igisa no gusubira inyuma" ku buzima bwe nyuma yo kunanirwa kwitabira inama z'abaminisitiri ebyiri.

Mu kwezi kwa Mbere Bwana Buhari yamaze ibyumweru birindwi ari mu kiruhuko cy'uburwayi aza no kujya mu Bwongereza kwivuza.

Igihe yagarukaga mu kwezi kwa Gatatu yavuze ko atari yarigeze arwara bigeze aho mu buzima bwe.

Bwana Buhari ntiyahishuye indwara ye ariko avuga ko yongerewe amaraso.

Mu itangazo ryasohowe n'iri tsinda ry'abanya Nijeriya 13 bafite ijambo rikomeye, bavuze ko Perezida buhari ntiyigeze agaragara mu ruhame kuva mu cyumweru gishize, ndetse ibura rye mu nama ebyiri z'abaminisitiri n'amasengesho ya buri wa Gatanu y'abayisilamu, byateye ibindi bihuha byerekeye ubuzima bwe.

Mu itangazo ryabo, iri tsinda ryanashyizemo bamwe mu mpirimbanyi zikomeye z'uburenganzira bwa kiremwamuntu barimo n'umunyamategeko Femi Falana, umusesenguzi mu bya politike Jibrin Ibrahim n'umuyobozi w'umuryango Transparency International ishami rya Nijeriya, Anwal Musa Rafsanjani.

Bavuze ko bumva bagomba gusaba Bwana Buhari "kumvira inama y'abaganga be bwite agafata ikiruhuko cyo kwita ku buzima bwe nta yindi nkerereza."

Abakorana na Bwana Buhari ntacyo bari bavuga kuri iri tangazo.

Mu cyumweru gishize, umuvugizi wa perezida, Garba Shehu yavuze ko Bwana Buhari "ari kugenza ibintu gahoro, mu gihe ari koroherwa ava mu burwayi bw'igihe kirekire" mu Bwongereza.

Ubuzima butameze neza bwa Buhari muri 2017

19 z'ukwa Mbere: Yafashe ikiruhuko cy'uburwayi ajya kwivuza mu Bwongereza

05 z'ukwa Kabiri: Yasabye inteko ishinga amategeko kongera igihe cy'ikiruhuko cy'uburwayi

10 z'ukwa Gatatu: Yasubiye mu gihugu ariko ntiyasubira ku kazi ako kanya

26 z'ukwa Gatandatu: Yabuze mu nama y'abaminisitiri ku nshuro ya kabiri "akorera akazi mu rugo"

28 z'ukwa Kane: Abura mu masengesho yo ku wa Gatanu y'abayisilamu