Perezida wa Nijeriya Buhari yongeye gusiba inama y'abaminisitiri

Mu rukurikirane rw'ubutumwa bwo ku rubuga nkoranyambaga "Twitter", Aisha Buhari (ibumoso) yagerageje guhumuriza Abanyanijeriya bahangayikiye ubuzima bwa Perezida Uwufise ububasha kw’isanamu AFP
Image caption Mu rukurikirane rw'ubutumwa bwo ku rubuga nkoranyambaga "Twitter", Aisha Buhari (ibumoso) yagerageje guhumuriza Abanyanijeriya bahangayikiye ubuzima bwa Perezida

Umugore wa Perezida wa Nigeriya Aisha Buhari yavuze ko umugabo we atarwaye ku kigero biri kwibazwaho.

Mu butumwa yanyujije ku rubuga rwe rwa tuwita, yavuze ko Perezida Muhammadu Buhari ufite imyaka 74 y'amavuko, yakomeje "kuzuza inshingano ze" kandi ko yakomeje gukorana inama n'abaminisitiri.

Itsinda ry'Abanyanijeriya bakomeye basabye Bwana Buhari gufata ikiruhuko kubera uburwayi, mu gihe hakomeje kwiyongera impungege ku buzima bwe.

Mu kwezi kwa gatatu, Bwana Buhari yasubiye muri Nigeriya nyuma yo kumara mu Bwongereza ibyumweru birindwi by'ikiruhuko giturutse ku burwayi, aho yavuriwe indwara yagizwe ibanga.

Ubwo yasubiraga muri Nijeriya, yavuze ko mu buzima bwe atari yarigeze arwara cyane bigeze aho.

Ntiyagaragaye mu nama ebyiri n'abaminisitiri ziheruka kandi, mu buryo budasanzwe kuri we, ntiyitabiriye amasengesho yo ku munsi wa gatanu ushize ku musigiti uri ahari ibiro bye.

Madamu Buhari yanyujije ubutumwa bune ku rubuga rwe rwa tuwita avuga ku buzima bw'umugabo we, harimo bumwe aho yashimiye Abanyanijeriya.

Ati: "Ndashimira Abanyanijeriya bose kubera uguhangayika kwabo, urukundo rwabo n'amasengesho yabo kubera uko ubuzima bw'umugabo wanjye bumeze".

Yateje ukutavuga rumwe umwaka ushize ubwo mu gihe yagiranaga ikiganiro na BBC, yavuze ko atashyigikira umugabo yongeye kwiyamamaza keretse akoze impinduka muri leta ye. Avuga ko leta yafashwe bunyago n'itsinda ry'amabantu bacye.

Asubiza abamunenga, Bwana Buhari yavuze amagambo yamamaye cyane, avuga ko umugore we umwanya we uri "mu cyumba cyo kuryamamo".

Minisitiri w'itangazamakuru Lai Mohammed, yabwiye BBC ko ubuzima bwa Perezida "bumureba we ku giti cye" kandi ko Abanyanijeriya bamenyeshejwe uko Perezida ameze

'Fata ikiruhuko'

Abantu cumi na batatu bavuga rikumvikana bo mu miryango itegamiye kuri leta, ku wa mbere basohoye itangazo aho ugusiba kwa Perezida mu nama n'abaminisitiri, cyo kimwe no mu masengesho yo ku wa gatanu wa buri cyumweru, "kwatumye uruntu runtu n'ibihuha byiyongera" ku bijyanye n'ubuzima bwe.

Aba bantu cumi na batatu bumvise "bagomba" gusaba Bwana Buhari ko "akurikiza inama ajyirwa n'abaganga we bwite afata ikiruhuko akita ku buzima bwe atongeye gutinda".

Bashir Ahmed, umunyanama wa Bwana Buhari, yavuze ko Perezida yagiranye ibiganiro na Minisitiri w'ubutabera Abubakar Malami n'abandi bategetsi, byabereye mu biro bya Perezida ku wa kabiri, nkuko biri mu nshingano ze.

Mu cyumweru gishize, Garba Shehu, umuvugizi wa Perezida, yavuze ko Bwana Buhari yari arimo "kugenza ibintu gahoro, mu gihe ari kugarura agatege nyuma y'igihe kirekire yivuza" mu Bwongereza.

________________________________________

Igihe Bwana Buhari yatangiye kutamererwa neza mu buzima mu mwaka wa 2017

Ku itariki 19 z'ukwezi kwa mbere: Yagiye mu Bwongereza "mu kiruhuko gitewe n'uburwayi"

Ku itariki 5 z'ukwezi kwa kabiri: Yasabye inteko ishingamategeko kongera igihe cye cy'ikiruhuko

Ku itariki 10 z'ukwezi kwa gatatu: Yasubiye imuhira ariko ntiyahita yongera gusubira ku kazi ako kanya

Ku itariki 26 z'ukwezi kwa kane: Ku nshuro ya kabiri yasibye inama n'abaminisitiri kandi "arigukorera akazi mu rugo"

Ku itariki 28 z'ukwezi kwa kane: Yasibye amasengesho yo ku munsi wa gatanu