WhatsApp yaraye ivuye ku murongo benshi barumirwa

Ikirango cya WhatsApp Uwufise ububasha kw’isanamu WhatsApp
Image caption Ikirango cya WhatsApp

Abarenga miliyari bakoresha urubuga nkoranyambaga rwa WhatsApp ku isi baraye bagize ikibazo mu kurukoresha mbere yuko ubuyobozi bwarwo bushobora gukemura icyo kibazo.

Amakuru yuko hari ibibazo mu gukoresha Whatsapp, ikoreshwa n'abantu barenga miliyari imwe ku isi, yatangiye kumenyekana ahagana saa yine z'ijoro ku masaha yo mu Rwanda no mu Burundi (hafi saa mbiri ku isaha ngengamasaha ya GMT).

Mu itangazo rigufi ryashyizwe ahagaragara n'ubuyobozi bw'urubuga nkoranyambaga rwa WhatsApp, bwagize buti: "Tuzi icyo kibazo kandi turi gukora kugira ngo gicyemuke mu buryo bwihuse bushoboka".

Ahagana saa yine n'igice z'ijoro ku isaha ya GMT, benshi mu bakoresha WhatsApp bari bongeye gushobora kohereza no kwakira ubutumwa.

Ariko nkuko bitangazwa n'imbuga za interineti DownDetector na Outage Report, bamwe mu bakoresha WhatsApp bakomeje kugira ibibazo.

Kubangamirwa

Ubuyobozi bwa WhatsApp ntiburatangaza impamvu yateye icyo kibazo cyangwa uburyo cyari gikwiragiye ku isi.

Mu itangazo rya kabiri ryashyizwe ahagaragara n'ubuyobozi bwa WhatsApp, ryaje nyuma yaho WhatsApp yongeye gukora, bwagize buti: "Abakoresha WhatsApp mu bice byose byo ku isi ntabwo bashoboye kuyikoresha mu gihe cy'amasaha macye".

"Ubu ikibazo twagicyemuye kandi dusabye imbabazi ku kubangamirwa byateje".

Impuguke mu gukoresha imbuga nkoranyambaga, Dave Anderson, ukora muri kompanyi ya Dynatrace, yabwiye BBC ko icyo kibazo gishobora kuba cyaratewe n'ibikorwa byo kuvugurura WhatsApp.

WhatsApp na Snapchat

Urubuga nkoranyambaga WhatsApp rwaguzwe n'urundi rubuga nkoranyabaga rwa Facebook mu mwaka wa 2014.

Mu masaha ya kare yo ku wa gatatu, umuyobozi wa Facebook, Mark Zuckerberg, yari yatangaje ko uburyo bushya mu rubuga WhatsApp bwatumye abayikoresha biyongeraho miliyoni 175 kuva ubwo buryo bwatangizwa mu kwezi kwa kabiri.

Ubwo buryo bukora nk'izindi mbuga nkoranyambaga za Snapchat na Instagram. Butuma abakoresha WhatsApp bashobora kohererezanya ubutumwa bugizwe n'amagambo, amafoto n'amavidewo, byose birigita nyuma y'amasaha 24.

Urubuga Snapchat, rwatangiye mu kwezi kwa cyenda mu mwaka wa 2011, bivugwa ko rukoreshwa n'abantu miliyoni 160.

Mu kwezi gushize, urubuga Instagram rwatangaje ko abantu bagera kuri miliyoni 200 barukoresha buri munsi mu buryo bwo gusangira amakuru.