Umuyobozi urwanya irondaruhu mu mikino ashyigikiye Muntari

Fiona May yahagarariye Ubutaliyani mu mikino yo ku rwego rw'isi no ku rwego rw'Uburayi Uwufise ububasha kw’isanamu Getty Images
Image caption Fiona May yahagarariye Ubutaliyani mu mikino yo ku rwego rw'isi no ku rwego rw'Uburayi

Umujyanama mu rwego rushinzwe kurwanya irondaruhu mu mikino mu Butaliyano yavuze ko na we yari kwigaragambya iyo akorerwa ibyo umukinnyi Sulley Muntari yakorewe.

Fiona May yavuze ko umwanzuro kongera igihano cyari cyahawe Muntari, umukinnyi ukomoka muri Ghana ukina hagati mu ikipe ya Pescara wigaragambije kubera irondaruhu yarakorewe mu gihe abafana bo nta gihano bahawe, "watanze ubutumwa bubi".

Yongeyeho ko iyo na we aza kuba Muntari, na we ubwe yari kwigaragambya. Yagize ati: "Ndumiwe kandi ndababaye".

Muntari yahawe ikarita y'umuhondo mu mukino n'ikipe ya Cagliari mu gihe yegeraga umusifuzi yinubira uko abafana b'iyi kipe bamupfobeje.

Hanyuma yongerwa ikarita ya kabiri y'umuhondo kubera kwikura mu kibuga nta ruhushya ahawe.

Akanama k'imyitwarire muri shampiyona y'umupira w'amaguru mu Butaliyani izwi nka Serie A kongereye igihano Muntari yari yahawe, ariko kanga guhana abafana kubera ko ngo gusa "abagera ku 10" ari bo baririmbye indirimbo zirimo irondaruhu.

Ngo rero abo bafana ntibari benshi bihagije ngo bitume kabaha igihano gashingiye ku mategeko akagenga.

Image caption Sulley Muntari abwira amagambo umusifuzi mu mukino ikipe ye ya Pescara yatsinzwe na Cagliari

Fiona yavuze ko aka kanama k'imyitwarire kakoze amakosa mu gukurikiza buhumyi amategeko akagenga. Yagize ati: "Ntabwo ushobora kugendera ku mubare w'ababikoze mu gihe umukinnyi apfobejwe mu kibuga. Ni gute ibyo wabishingira ku mubare?"

"Ntabwo abagize ako kanama bagomba kuvuga batyo. Nta shingiro bifite niba yari umufana umwe cyangwa abafana 100, ntabwo bagombaga kuba baririmba indirimbo zirimo irondaruhu. Nta kindi".

Isura y'umupira w'amaguru mu Butaliyani

Fiona yananenze umusifuzi Daniele Minelli wasifuye uwo mukino, avuga ko yakagombye kuba "yarahagaritse umukino akumva" ibyo Muntari yamubwiraga.

Yongeyeho ati: "Umupira w'amaguru ni umukino uzwi ku isi yose kandi nabwiye perezida w'ishyirahamwe ry'umupira w'amaguru mu Butaliyani ko 'ibi byabaye bidafasha isura y'umupira w'amaguru w'Ubutaliyani habe na busa'".

"Mama wanjye uba mu Bwongereze yarampamagaye kuri telefoni arambaza ati 'ibyo ni ibiki biri kubera aho?'"

Fiona yongeyeho ko ibyabaye kuri Muntari bigaragaza uburyo irondaruhu rishinze imizi cyane kurusha uko abantu babitekereza, nubwo bwose habaye ibikorwa byinshi byo kwigisha abantu kurirwanya. Ngo inzira iracyari ndende.

Fiona wavukiye mu Bwongereza yahoze uri umukinnyi usiganwa mu kwiruka n'amaguru. Yahawe akazi n'ishyirahamwe ry'umupia w'amaguru mu Butaliyani mu mwaka wa 2014.

Yabwiye BBC ati: "Navuga ko abakinnyi bose ari ko bagakwiye kubigenza mu rwego rwo kwifatanya", nubwo bwose yashimangiye ko ibyo yabivuze ateganya.