Ubushinwa bwamuritse indege nini ya mbere bwakoze

Indege ya mbere nini mu Bushinwa yarangije urugendo rwayo rwa mbere Uwufise ububasha kw’isanamu AFP
Image caption Indege ya mbere nini mu Bushinwa yarangije urugendo rwayo rwa mbere

Indege ya mbere nini mu zikorewe mu Bushinwa zitwara abagenzi yasoje urugendo rwayo rwa mbere, ikaba ije guhangana n'indege zo mu bwoko bwa Boeing na Airbus.

Yaguye ku kibuga cy'indege cya Pudong kiri mu ntara Shanghai, nyuma yo kumara iminota igera kuri 90 mu kirere.

Iyi ndege ni ikimenyetso gikomeye kigaragaza gahunda ikomeye y'Ubushinwa yo kwinjira mu isoko mpuzamahanga ryo gutwara abantu mu ndege.

Yakozwe na kompanyi ya leta yitwa Comac. Gahunda yo kugurutsa iyi ndege yateganywaga mu mwaka wa 2008 ariko ikomeza kugenda isubikwa.

Mu rugendo rwayo kuri uyu wa gatanu, iyi ndege yari igizwe n'igikanka cyayo gusa kigizwe n'abapilote batanu n'abafundi bayo.

Yahagurukiye imbere y'ikivunge cy'abanyacyubahiro babarirwa mu bihumbi, abakozi bo mu ndege n'abakunzi b'indege.

Guhangana na Boeing na Airbus

Mbere yuko itangira urugendo, televiziyo ya leta y'Ubushinwa yatangaje ko iyi ndege iza kugurukira gusa ku butumburuke bwa metero 3000, buri munsi ho metero 7000 ku butumburuke busanzwe bugurukwaho n'indege mu rugendo rusanzwe, kandi ikagendera ku muvuduko wa kilometero 300 ku isaha.

Iyi ndege izwi ku izina rya C919 yakozwe mu rwego rwo guhangana na Boeing 737 na Airbus A320.

Mu kiganiro cyakozwe mu kwezi kwa gatatu ariko cyatangajwe kuri televiziyo ya leta y'Ubushinwa mbere gato yuko iyi ndege ihaguruka, umupilote Cai Jun uyigerageza yavuze ko ayifitiye icyizere cyose.

Uwufise ububasha kw’isanamu AFP
Image caption Iyi ndege iracyakoresha ibikoresho byinshi by'ikoranabuhanga byatumijwe hanze

Yagize ati: "Umupilote aba azi neza uko indege imeze. Azi neza cyane niba izaguruka. Rero nta bwoba na bucye mfite, ariko ndikwibanda cyane kukumva niba ubu iyi ndege iteye neza cyane".

Yanavuze ko hahagaritswe igikorwa cyo kuyigurutsa mu mpera y'umwaka wa 2016 kubera ko yari ifite ikibazo cya feri. Ati: "Ni nko gutwrara imodoka. Nafashe feri, hanyuma indege itangira kunyeganyega".

Yavuze ko yagombye guharira n'abafundi b'indege kugira ngo banoze neza uko iteye.

"Ku bashinzwe kunonosora uko indege iteye, kuri bo ni nk'umwna wabo, baba bumva ameze neza. Ariko twe akazi kacu ni ukubabwira ko umwana wabo atameze neza, ko afite ingufu akanagira intege nke, ko hakiri ibyo kunoza".

Ibikoresha byatumijwe hanze

Ariko iyi ndege iracyakoresha ibikoresho byinshi by'ikoranabuhanga byatumijwe hanze. Nk'urugero, moteri zayo zitangwa n'uruganda rw'Abafaransa n'Abanyamerika rwa CFM International.

Nkuko abategetsi babitangaza, ibyuma by'indege zirenga 500 ubu byamaze gutumizwa, n'abakiriya 23 biganjemo Abashinwa biteguye kuzigura. Umukiriya w'ibanze ni kompanyi ya China Eastern Airlines.

Uwufise ububasha kw’isanamu Getty Images
Image caption Indege C919 ifite ubushobozi bwo gutwara abagenzi 168

Ikigo cyo mu Burayi kigenzura ubuziranenge bw'indege cyatangiye kugenzura iyi ndege y'Ubushinwa ya C919. Ikaba ari intambwe y'ingenzi kugira ngo iyi ndege ishobore kuguruka neza ku isoko mpuzamahanga.

Ubushinwa bwatangiye kugira indoto zo kugira uruganda rukora indege guhera mu myaka ya 1970, igihe umugore w'umutegetsi Mao Zedong, ari we Jiang Qing, na we ubwe yari ashyigikiye uwo mugambi.

Ariko indege ya Y-10, yubatswe mu myaka ya 1970, ntiyari ishobotse kubera uburemere bwinshi bwayo. Indege eshatu zonyine z'ubwo bwoko ni zo zagiye ahagaragara.

Biteganyijwe ko mu myaka makumyabiri iri imbere, isoko ryo gutwara abantu mu ndege ku isi rizaba rifite agaciro ka tiriyari 2 z'amadolari y'Amerika.