Tenisi: Maria Sharapova arakina na Eugenie Bouchard

Maria Sharapova yari yarahagaritswe kubera gufata imiti itemewe. Uwufise ububasha kw’isanamu EPA
Image caption Maria Sharapova yari yarahagaritswe kubera gufata imiti itemewe.

Umunyakanadakazi Bouchard yavuze ko Sharapova ari "umunyamariganya", ibi akaba yabivuze mu gihe uyu Murusiyakazi yitegura kongera kwitabira amarushanwa ya tenisi mu kwezi kwa kane nyuma yo kumara amezi cumi n'atanu adakina kubera guhagarikwa biturutse ku gukoresha ibiyobyabwenge bimwongerera ingufu.

Sharapova ufite imyaka 30 y'amavuko akaba yaranatwaye igikombe cy'iri rushanwa mu mwaka wa 2014, kuri uyu wa mbere arakina na Bouchard uri ku mwanya wa 59 ku rwego rw'si. Ni umukino uba ku isaha ya saa kumi n'ebyiri ku isaha ngengamasaha ya GMT, ni ukuvuga saa mbiri z'ijoro ku masaha yo mu Rwanda no mu Burundi.

Bouchard, watsinze Alize Cornet ku wa gatandatu, yemeza ko Sharapova watwaye igikombe cya Grand Slam akwiye guhagarikwa burundu.

Sharapova yatsinze Umunyacrowasiyakazi Mirjana Lucic-Baroni ku maseti 4-6, 6-4, 6-0, ibi akaba abigezeho nyuma yo kugera mu mikino ya kimwe cya kabiri i Stuttgart mu Budage.

Mu kwezi kwa cumi mu mwaka wa 2016, urukiko nkemurampaka mu mikino rwanzuye ko Sharapova atari "ukoresha ibiyobwabwenge byongera ingufu abigambiriye".

Sharapova yagize ati: "Iyo umaze igihe kirekire udakina nta kindi uba ushaka kitari ugukina imikino myinshi ishoboka".

Umudagekazi Angelique Kerber uri ku mwanya wa kabiri ku isi, yageze mu cyiciro cya kabiri cy'irushanwa bimworoheye cyane, nyuma yo gutsinda Umunyahongiriyakazi Timea Babos ku maseti 6-4 na 6-2.

Uyu Mudagekazi ni we uyoboye itsinda ahuriyemo n'Umunyamerikakazi Serena Williams uri ku mwanya wa mbere ku isi watwaye igikombe cya Grand Slam inshuro 23, ariko kuri ubu utari mu irushanwa kubera yitegura kubyara.

Muri uyu mwaka w'imikino, Kerber ntiyitwaye neza bishimishije, ariko nanone ni gacye yananiwe kubona intsinzi mu isaha imwe gusa ageze mu kibuga.

Umunyadenmarkkazi Caroline Wozniacki we byamufashe amasaha agera kuri atatu n'igice kugira ngo abashe gutsinda Umunyaromaniyakazi Monica Niculescu ku maseti 7-5, 6-7, 6-4.

Umufaransakazi Kristina Mladenovic uri ku mwanya wa 17 ku rwego rw'isi, watsinze Sharapova i Stuttgart, na we yakomeje nta kibazo nyuma yaho Umunyacrowasiyakazi Ana Konjuh yikuye mu marushanwa bamaze kunganya mu mukino.

Umurusiyakazi Svetlana Kuznetsova, uri ku mwanya wa munani ku rwego rw'isi wanageze ku mukino wa nyuma i Madrid mu mwaka wa 2015, yakomeje bimworoheye amaze gutsinda Umurusiyakazi mugenzi we Yaroslava Shvedova ku maseti 6-4, 6-3.

Umunyaromaniyakazi Simona Halep ufite iki gikombe yatsinze Umunyacekekazi Kristyna Pliskova ku maseti 6-1, 6-2.

Ariko ukwitwara nabi muri uyu mwaka w'imikino k'Umunyespanyekazi Garbine Muguruza watwaye irushanwa rya French Open ndetse wanahabwaga amahirwe kubera ko yakiniraga iwabo, kwamokeje ubwo yatsindwaga n'Umusuwisikazi Timea Bacsinszky ku maseti 6-1, 6-3.