Indwara ya Ebola muri Kongo Kinshasa

Icyorezo cya Ebola gikaze cya mbere mu mateka y'isi cyibasiye uburengerazuba bw'Afurika mu mwaka wa 2014 n'uwa 2015 Uwufise ububasha kw’isanamu Getty Images
Image caption Icyorezo cya Ebola gikaze cya mbere mu mateka y'isi cyibasiye uburengerazuba bw'Afurika mu mwaka wa 2014 n'uwa 2015

Nkuko ishami ry'umuryango w'abibumbye ryita ku buzima, WHO, ribitangaza, nibura umuntu umwe yapfuye azize virusi ya Ebola mu majyaruguru y'uburasirazuba bwa Repubulika Iharanira Demokarasi ya Kongo.

Mu butumwa yanyujije ku rubuga nkoranyambaga rwa Twitter, WHO yongeyeho ko Minisiteri y'ubuzima muri Kongo, yari yarayimenyesheje ko hari "ibizamini byo kwa muganga byemeje" umuntu urwaye Ebola.

Abantu barenga 11000 bahitanywe n'icyorezo cya Ebola mu burengerazuba bw'Afurika mu mwaka wa 2014 n'uwa 2015, cyane cyane mu bihugu bya Guinea, Sierra Leone na Liberia.

Indwara ya Ebola iheruka muri Repubulika Iharanira Demokarasi ya Kongo mu mwaka wa 2014. Icyo gihe yahitanye abantu 42.

Itangazo rya Minisiteri y'ubuzima muri Kongo rivuga ko iyi ndwara ya Ebola yemejwe nyuma y'ibizamini byo kwa muganga byakorewe ku bantu icyenda bafite umuriro kandi bavaga amaraso ahantu hari umwenge hose, ku itariki 22 z'ukwezi kwa kane cyangwa se nyuma yaho, mu ntara ya Bas-Uele iri mu majyaruguru y'igihugu.

Umuvugizi wa WHO muri Kongo, Eric Kabambi, yabwiye ibiro ntaramakuru Reuters ati: "Ni mu gace kari ahantu hitaruye cyane, kiganjemo amashyamba. Rero dufite amahirwe macye. Ariko ibi ni ibintu twitaho cyane".