Perezida Rouhani yatsindiye manda ya kabiri

Hassan Rouhani Uwufise ububasha kw’isanamu AFP
Image caption Rouhani (hagati) igihe yarimo atora

Televiziyo ya leta muri Irani iravuga ko Perezida ucyuye igihe, Hassan Rouhani, yatsinze amatora y'umukuru w'igihugu.

Iyo televiziyo iravuga ko ku majwi miliyoni 40, Bwana Rouhani amaze kubona arenze kimwe cya kabiri mu gihe hari uturere twinshi tutari twarangiza kubarura.

Umukandida w'ingenzi bari bahanganye yavuze ko muri ayo matora habayemo utunenge.

Uwufise ububasha kw’isanamu Getty Images
Image caption Abantu miliyoni 56 bari bemerewe gutora

Ebrahim Raisi, wo mu badashaka ko ibintu bihinduka, yashinje abashyigikiye Bwana Rouhani gukorera ibikorwa by'icengezamatwara ku biro by'amatora kandi bibujijwe n'amategeko.

Amajwi yo mu mijyi - ubundi yinganjemo abashyigikiye Rouhani - ntabwo bari barangiza kuyabarura.

Bwana Rouhani, w'imyaka 68 y'amavuko, yasezeranyije abaturage b'igihugu cye politiki cyo gucisha make no kubana neza n'ibindi bihugu.

Yishimiye kandi amasezerano yatumye igihugu cye cyumvikana n'amahanga muri 2015 ku birebana na gahunda yacyo y'ingufu za nucleaire.