Igitero i London: Polisi iravuga ko abantu 12 batawe muri yombi mu gace ka Barking nyuma y'igitero cy'i London

Abantu 12 batawe muri yombi nyuma y'igitero cy'i London cyishe abantu barindwi abandi bagera kuri 48 bagakomereka.

Itabwa muri yombi ry'abantu bafatiwe mu gace kitwa Barking, mu burasirazuba bwa London, ryabaye nyuma y'igitero cya polisi cyagabwe ku nzu y'umwe mu bagabye igitero cy'iterabwoba.

Imodoka y'ibara ry'umweru yishoye ku kiraro cyitwa London Bridge ahayinga saa 22:00 ku wa Gatandatu, abantu batatu bahise bava mu modoka batangira gutera ibyuma abagenzi bari hafi ya Borough Market. Bahise baraswa na polisi.

Minisitiri w'intebe Theresa May yavuze ko ari igihe cyo kuvuga ngo "birahagije."

Iki ni igitero cya gatatu mu Bwongereza mu gihe cy'amezi atatu, nyuma y'ikindi cyagabwe ku nteko ishinga amategeko ahitwa Westminister mu kwezi kwa Gatatu kikica abantu batanu ndetse n'icyagabwe i Manchester mu gihe kitageze ku byumweru bibiri kikica abantu 22.

Umunyamakuru wa BBC, Holly Jones, wari uri ku kiraro, yavuze ko imodoka yari itwaye abagabye igitero yagendaga ku muvuduko munini cyane hanyuma ikagonga abantu batanu cyangwa batandatu.

Abantu barimo banywa inzoga hafi y'ahabereye igitero, basazwe n'ubwoba bamwe bahise birukira hafi ya sitasiyo ya London Bridge kwihisha.

Uwufise ububasha kw’isanamu Reuters
Image caption Polisi yitwaje intwaro iri gusaka amazu ahitwa Barking mu burasirazuba bwa London

Amwe mu makuru mashya:

Abaganga barenga 80 boherejwe ahabereye igitero. Abantu bakomeretse barimo abarembye cyane bari kuvurirwa mu bitaro bitanu bitandukanye mu mujyi wa London.

  • Polisi yashyizeho umurongo wa telefoni wo kwifashishwa n'inkomere 0800 096 1233 cyangwa 020 7158 0197 ku bantu bafite impungenge z'amakuru y'inshuti zabo cyangwa abavandimwe.
  • Umwe mu bakomeretse ni umwe mu bapolisi bashinzwe umutekano muri gari ya moshi watewe icyuma igihe yajyaga gufasha abakomeretse. Ibikomere bye birakomeye ariko ntabwo bishobora kumwica.
  • Abandi bapolisi batatu nabo bakomeretse
  • Minisitiri w'Intebe wa Australiya, Malcolm Turnbull, yavuze ko abanya Australiya babiri bagizweho ingaruka n'ibi bitero ku buryo butaziguye. T
  • Minisiti w'ububanyi n'amahanga, Jean-Yves Le Drian, yavuze ko Abafaransa bane bakomeretse, umwe yakomeretse bikomeye

Igihe yavugiraga imbere y'ibiro bye, Downing Street, Minisitiri w'Intebe Theresa May yavuze ko "guverinoma idashobora kwiyerurutsa ngo yemere ko ibintu bikomeza uko bimeze."

Yagize ati:

"Twizera ko turi kubona ibintu bidasanzwe mu buryo ibintu biteye inkeke bivamo iterabwoba."

Madamu May yavuze ko inzego z'uburyo bwo gukumira iterabwoba ziri busuzume uburyo bukoreshwa ndetse Ubwongereza bukorane n'ibindi bihugu mu gukumira ko interineti iba indiri y'abaterabwoba.

Yavuze ko "hari ukwihanganira ubuhezanguni cyane mu gihugu cyacu" kandi ko n'ubwo ibi bishobora gutuma haba ibiganiro bikomeye" ariko ibi bigomba guhinduka.

Urwego rw'umutekano rwakajijwe mu Bwongereza ndetse urugero rw'ubukana bushobora gutera ikindi gitero burazamurwa.

Uwufise ububasha kw’isanamu H. Attai
Image caption Imodoka y'umweru hagati muri iyi foto, byizerwa ko ari yo yakoreshejwe mu kugaba igitero.
Uwufise ububasha kw’isanamu Getty Images
Image caption Imbangukiragutabara zaje i London Bridge gufasha abakomeretse.
Uwufise ububasha kw’isanamu PA
Image caption Abantu birukiye ahitwa Borough High Street bahunga igitero