Inkongi i London: Minisitiri w'intebe yategetse iperereza risesuye

Umuriro ushobora kugaragara hano imbere mu gice cy'inzu ya Grenfell Tower kuri uyu wa kane
Image caption Umuriro ushobora kugaragara hano imbere mu gice cy'inzu ya Grenfell Tower kuri uyu wa kane

Umubare w'abahitanywe n'inkongi byitezwe ko wiyongera kubera ko abayoboye ibikorwa byo kuyizimya batiteze ko hari abandi bantu bayirokotse bari bubone.

Inyubako izwi nka Grenfell Tower yahiye igakongoka, iri mu majyaruguru y'agace ka Kensington.

Abantu bakomeje gushakana umutima uhagaze amakuru y'abo mu miryango yabo n'inshuti zabo.

Minisitiri w'intebe Theresa May yavuze ko "hakenewe ibisubizo" ku mpamvu yatumye inkongi y'umuriro ishobora gukwirakwira mu buryo bwihuse, avuga ko iperereza "rizabitanga".

Madamu May yagiriye urugendo rugufi kandi rwo ku giti cye aho hantu hibasiwe n'inkongi.

Yagize ati: "[Abashinzwe ubutabazi] bambwiye ko uburyo umuriro wakwirakwiye ukibasira inyubako, wihuse, wari ufite ubukana, kandi ntibyari byitezwe".

Yongeyeho ati: "Rero ni byo ko usibye raporo yihutirwa izakorwa ndetse n'iperereza rya polisi rishobora gukorwa, ko hakorwa iperereza risesuye ku cyateye ibi byose".

Jeremy Corbyn, umuyobozi w'ishyaka Labour, nawe yasuye ahibasiwe n'inkongi, abwira abayobozi b'inzego z'ibanze ko "ukuri kugomba kujya ahagaragara".

Uwufise ububasha kw’isanamu Getty Images
Image caption Umuyobozi w'ishyaka rya Labour, Jeremy Corbyn, yaganiriye n'abazimya umuriro n'abayobozi b'inzego z'ibanze, igihe yasuraga ahibasiwe n'inkongi

Umunyamakuru wa BBC ukurikirana ibibazo bya politiki aravuga ko iri perereza niriramuka rigenze nk'uko andi maperereza ajya agenda, "rishobora kuba riyobowe n'umucamanza".

Uwufise ububasha kw’isanamu Getty Images
Image caption Minisitiri w'intebe yavuganye n'ukuriye kuzimya umuriro, Dany Cotton, igihe yarebaga ibyangijwe n'inkongi

Abantu barenga 30 baracyari mu bitaro, 17 muri bo bakaba ari indebe.

Umwamikazi Elizabeth II yavuze ko mu "bitekerezo n'amasengesho" ye yifatanyije n'imiryango yagize ibyago.

Mu masaha y'urukerera yo ku wa gatatu, abazimya inkongi y'umuriro bahamagariwe gutabara iyo nzu yo kubamo y'amagorofa 24, icyo gihe abantu amagana n'amagana bakaba bari bayirimo, benshi muri bo basinziriye.

Benshi bakanguwe n'abaturanyi cyangwa n'urusaku rw'abari mu nsi yabo, nuko bahunga iyo nyubako.

Abazimya inkongi bashoboye gutaba abantu bakuru n'abana bose hamwe 65, ariko bamwe bagumye mu nzu zabo muri iyo nyubako, bakubwe n'umwotsi n'indimi z'umuriro.

Hagati aho, ibikorwa by'ubutabazi birakomeje.

Uwufise ububasha kw’isanamu Getty Images
Image caption Inkweto zibarirwa mu magana zatanzwe nk'imfashanyo ziri mu nzu y'imyidagaduro ya Westway Sports Centre iri kwakira abagizweho ingaruka n'inkongi
Uwufise ububasha kw’isanamu Getty Images
Image caption Ibigo byakira abantu byuzuye imfashanyo zaturutse mu mujyi wa London n'ahandi mu Bwongereza