Umugore wa Minisitiri w'intebe yishwe muri Lesotho

Nyakwigendera Lipolelo Thabane yari amaze igihe atakibana n'umugabo we Uwufise ububasha kw’isanamu CHINA TV
Image caption Nyakwigendera Lipolelo Thabane yari amaze igihe atakibana n'umugabo we

Igipolisi kiravuga ko Lipolelo Thabane wari ufite imyaka 58 y'amavuko, yari ari mu mudoko hamwe n'inshuti ye y'umugore igihe bombi baraswaga n'umuntu utaramenyekana.

Igipolisi cyo muri Lesotho cyongeraho ko impamvu y'urwo rupfu itazwi, ndetse ubu iperereza rikaba rikomeje.

Kuva mu mwaka wa 2012, Minisitir w'intebe Thomas Thabane n'uwo bari barashakanye Lipolelo Thabane ntibabanaga, ndetse bari baragiye mu rukiko basaba gatanya nubwo batari bayibona.

Umunyamakuru wa BBC aravuga ko abaturanyi ba nyakwigendera bavuga ko mu ntangiriro y'iki cyumweru, itsinda ry'abagabo batamenyekanye bagaragaye bahonda inyundo ku rugi rw'inzu y'uyu wari umugore w'umutegetsi wa Lesotho.

Ibiro ntaramakuru AFP biravuga ko nyakwigendera yari yaratsinze umugabo we mu rubanza mu rukiko rukuru, bityo akaba yabonaga ibigenerwa umugore w'umukuru w'igihugu, aho kugira ngo bibone umugore muto wa Bwana Thabane, Liabiloe.

Bwana Thabane ubu abana n'umugore wa gatatu.

Samonyane Ntsekele, umunyamabanga mukuru w'ishyaka All Basotho Convention rya Bwana Thabane, yabwiye ibiro ntaramakuru AFP ko Bwana Thabane yababajwe cyane n'iryo raswa.

Yagize ati: "Buri muntu wese yahahamuwe n'ibyabaye".

Amatora yabaye mu ntangiriro y'uku kwezi kandi yari aya gatatu abaye mu gihe cy'imyaka itatu.

Umunyamakuru wa BBC aravuga ko hari ukurwanira ubutegetsi gukomeye mu gihugu cya Lesotho kandi Bwana Thabane aracyafite abanzi mu gisirikare.

Biteganyijwe ko Bwana Thabane azarahira ku wa gatanu.