Umwamikazi Elizabeth II n'igikomangoma William basuye ahafashirizwa abarokotse ururiro

Umwamikazi Elizabeth II yeretswe ibiribwa byafashishijwe abasigaye badafite aho kuba kubera inkongi Uwufise ububasha kw’isanamu PA
Image caption Umwamikazi Elizabeth II yeretswe ibiribwa byafashishijwe abasigaye badafite aho kuba kubera inkongi

Gusura ikigo cy'ubufasha cya Westway Sports Centre kubaye nyuma yaho igipolisi kivugiye ko bamwe mu bahitanywe n'iyo nkongi bashobora kutazigera bamenyekana.

Umwamikazi Elizabeth II n'igikomangoma William bahuye n'abakorerabushake, abaturage, n'abayobozi b'inzego z'ibanze.

Ku wa kane, Umwamikazi Elizabeth II yashimye "ubutwari" bw'abazimya inkongi y'umuriro ndetse n' "ubuntu butangaje" bw'abakorerabushake bakomeje gutanga ubufasha.

Igipolisi cyemeje ko abantu bagera kuri 30 bahitanywe n'iyo nkongi.

Stuart Cundy, umukuru w'igipolisi, yavuze ko umwe muri abo yapfuye ageze mu bitaro.

Yongeyeho ko nta kintu na kimwe kigaragaza ko iyo nkongi y'umuriro yabaye yatewe n'umuntu wabikoze ku bwende. Yavuze ko buri muntu wese wagejwejwe mu bitaro ubu umwirondoro we uzwi.

Igipolisi kiravuga ko abantu bagera kuri 76 bataramenyerwa irengero.

Uyu munsi ni uwa gatatu inzego z'ubutabazi ziri gushakisha imibiri y'abaguye mu nyubako Grenfell Tower yakongotse mu majyaruguru y'agace ka Kensington.

Abayoboye ibikorwa byo kuzimya inkongi baravuga ko batiteze kubona abandi barokotse inkongi. Minisitiri w'intebe w'Ubwongereza we yategetse ko hakorwa iperereza risesuye.

Ku wa kane, igipolisi cyavuze ko cyamaze gutangira iperereza ngenzacyaha ku cyateye iyo nkongi.

Minisitiri w'intebe - wanenzwe cyane kubera kudahura n'abarokotse inkongi igihe yasuraga aho yabereye ku wa kane - yavuze ko abayiguyemo "bacyeneye ibisubizo".

Mu gitondo cyo kuri uyu wa gatanu, Madamu May yasuye abakomeretse, kandi byitezwe ko aza kuyobora inama ihuriwemo n'inzego z'ubuyobozi zitandukanye mu rwego rwo gufasha abagizweho ingaruka kongera kwiyubaka.

Alok Sharma, Minisitiri ushinzwe imiturire, yavuze ko leta iri gukorana n'ubuyobozi bw'ibanze kugira ngo "buri muryango wose wongere gutuzwa".

Mu buryo bw'agateganyo, abantu batandatu mu baguye mu nkongi y'umuriro bamaze kumenyekana.

Ariko Cundy, umukuru w'igipolisi, yavuze ko hari "ibyago ko mu buryo bubabaje dushobora kutazamenya buri muntu".