Trump yemeje ko ari gukorwaho iperereza

Bwana Trump yongeye kuvuga ko iperereza rijyanye n'Uburusiya ari "ukungendaho" Uwufise ububasha kw’isanamu Getty Images
Image caption Bwana Trump yongeye kuvuga ko iperereza rijyanye n'Uburusiya ari "ukungendaho"

Perezida Donald Trump yagaragaye nk'uwemera ko arimo gukorwaho iperereza rijyanye n'irindi perereza riri gukorwa ku birego byuko Uburusiya bwivaze mu matora yo muri Amerika.

Mu butumwa yanyujije ku rubuga nkoranyambaga rwa Twitter, Perezida Trump yabaye nk'ushinja umushinjacyaha mukuru wungirije, kumugendaho.

Yagize ati: "Ndimo gukorwaho iperereza kubera ko nirukanye umuyobozi wa FBI [urwego rw'ubutasi rukorera imbere muri Amerika], rigakorwa n'umugabo wambwiye ngo ninirukane umuyobozi wa FBI!"

Rod Rosenstein, umushinjacyaha mukuru wungirije, yanditse ubutumwa bugufi bw'akazi ibiro bya Perezida w'Amerika bya White House byashingiyeho byirukana uwahoze ari umuyobozi wa FBI.

Bwana Rosenstein yashinzwe gukurikirana iperereza ryo kureba niba Uburusiya bwarivanze mu matora yo muri Amerika, nyuma yaho umushinjacyaha mukuru Jeff Sessions yeguye kuri iyo mirimo mu kwezi kwa gatatu.

Umushinjacyaha mukuru wungirije na we yaje gushyiraho umujyanama udasanzwe Robert Mueller ngo ayobore iryo perereza.

Mu ntangiriro y'iki cyumweru, ibitangazamakuru byo muri Amerika byatangaje ko Bwana Mueller yari arimo gukora iperereza kuri Perezida ku kuba bishoboka ko abangamira ubutabera.

Bwana Mueller byatangazwaga ko yateganyaga kubaza abayobozi b'inzego z'ubutasi niba Bwana Trump yarikijije umukuru wa FBI, James Comey, mu kwezi kwa gatanu agamije kubangamira iperereza ku wo yirukanye Michael Flynn.

Bwana Flynn yari umujyanama wa Bwana Trump mu bijyanye n'umutekano w'igihugu.

Uwufise ububasha kw’isanamu Getty Images
Image caption Ubutumwa bugufi bw'akazi bwa Bwana Rosenstein nibwo bwabanje kwifashishwa mu gusobanura iyirukanwa ry'umukuru wa FBI, James Comey

Mu gitondo cyo kuri uyu wa gatanu, Bwana Trump yananditse ubundi butumwa ku rubuga nkoranyambaga rwa Twitter agira ati:

"Nyuma y'amezi arindwi y'amaperereza n'ubuhamya ku bijyanye nuko 'nakoranye n'Abarusiya', nta muntu n'umwe urerekana gihamya. Birababaje!"