Urugamba rwa Mosul: Ibisigazwa by'umusigiti wa al-Nuri byisubijwe

Aha ni imbere mu bisigazwa by'inyubako y'umusigiti wa al-Nuri Uwufise ububasha kw’isanamu @FerasKilaniBBC
Image caption Aha ni imbere mu bisigazwa by'inyubako y'umusigiti wa al-Nuri

Umunyamakuru wa BBC uri kumwe n'ingabo za Irake aravuga ko iyo nyubako icyugarijwe n'ibisasu bya bamudahusha n'ibya morutsiye.

Mu cyumweru gishize, intagondwa zaturikirije ibisasu kuri uyu musigiti ndetse no ku gasongero kawo.

Akoresheje imvugo ipfobya kuri uyu mutwe w'iterabwoba, Minisitiri w'intebe wa Irake, Haider al-Abadi, yavuze ko kwisubiza aka gace karimo uyu musigiti byabaye "indunduro ya leta ya baringa y'umutwe wiyita leta ya kisilamu".

Yagize ati: "Ntituzatezuka, ingabo zacu z'inyamurava zizatugeza ku ntsinzi".

Yongeyeho ati: "Tuzakomeza kurwanya umutwe w'iterabwoba wa IS kugeza umurwanyi wawo wa nyuma yishwe cyangwa agejejwe imbere y'ubutabera".

Uyu musigiti ufite igisobanuro gikomeye ku mbande zombi zihanganye mu rugamba rw'umujyi wa Mosul.

Niho Abu Bakr al-Baghdadi, umukuru w'umutwe w'iterabwoba wiyita leta ya kisilamu, yagaragaye ku nshuro imwe gusa nyuma yaho uyu mutwe uhatangaje nk'icyicaro cyawo, hashize imyaka itatu.

Uwufise ububasha kw’isanamu Reuters
Image caption Abu Bakr al-Baghdadi yagaragaye bwa mbere nk'umukuru w'umutwe w'iterabwoba wiyita leta ya kisilamu, ari kuri uyu musigiti mu kwezi kwa karindwi mu mwaka wa 2014

Abarwanyi b'umutwe wiyita leta ya kisilamu ubu barigusubira inyuma.

Bahungira mu bice bitandukanye bya Irake ndetse no mu gihugu gituranyi cya Syria, aho abarwanyi b'Abakurde n'Abarabu bashyigikiwe na Leta Zunze Ubumwe z'Amerika baryamiye amajanja mu mujyi wa Raqqa.

Umuvugizi w'urugaga rw'ingabo z'amahanga ziyobowe na Leta Zunze Ubumwe z'Amerika zishyigikiye ingabo za Irake, yanyujije ubutumwa ku rubuga nkoranyambaga rwa Twitter avuga ko ibirometero kare 84000 bimaze kwisubizwa.

Ndetse n'abantu barenga miliyoni enye babohowe ingoyi y'ubutegetsi bw'umutwe w'iterabwoba wiyita leta ya kisilamu.

Yongeyeho ati: "Ingirwa cyicaro cy'uyu mutwe kirimo guhirima, kuva hanze kugera imbere".

Mu kwezi kwa cumi mu mwaka ushize wa 2016, imitwe ifasha ingabo za Irake yagabye igitero cyo kwisubiza umujyi wa Mosul, ishyigikiwe ku butaka no mu kirere n'urugaga rw'ingabo z'amahanga ziyobowe na Leta Zunze Ubumwe z'Amerika.

Mu kwezi kwa mbere, iyo mitwe yashoboye kwigarurira igice cy'uburasirazuba bwa Mosul nuko ihita itangira igitero ku gice cy'uburengerazuba bwa Mosul mu kwezi gukurikiyeho kwa kabiri.