Abafashwe bugwate mu mashusho ya al-Qaeda muri Mali

Sophie Petronin Uwufise ububasha kw’isanamu SITE
Image caption Umufaransakazi Sophie Petronin yafashwe bugwate mu mujyi wa Gao mu kwezi kwa Cumi na Kabiri

Umutwe ushyigikiye al-Qaeda muri Mali wasohoye amashusho yerekana abanyamahanga batandatu bafashwe bugwate mbere y'urugendo rwa perezida w'Ubufaransa Emmanuel Macron, mu gihugu.

Abafashwe bugwate barimo umukozi w'umuryango muzamahanga utegamiye kuri leta, umuganga uri mu za bukuru wo muri Australiya ndetse n'umubikira wo muri Colombiya.

Amashusho yasohowe n'uyu mutwe yavuze ko "nta biganiro nyabyo" byo kubarekura byabaye.

Bwana Macron ari muri Mali mu rwego rwo gutera imbaraga ingabo z'igihugu zifashwa n'abasirikare b'Ubufaransa mu kurwanya inyeshyamba.

Yavuze ko Ubufaransa ndetse n'itsinda ry'ibihugu bitanu byo mu gace ka Sahel, bizwi nka "Sahel G5", ari byo Mali, Burkina Faso, Chad, Mauritaniya na Niger, bigomba gukorera hamwe mu kurandura "abaterabwoba, amabandi ndetse n'abicanyi."

Mu bantu bafashwe bugwate bagaragaye mu masusho, barimo na Sophie Petronin, wafashwe mu kwezi kwa 12 k'umwaka ushize mu mujyi wa Gao igihe yayoboraga umuryango mpuzamahanga ufasha abana barwaye bwaki.

Mu mashusho, humvikana ijwi rya Madamu Petronin wavugaga ko yizera ko Bwana Macron ari bushobore gufasha kumuhuza n'umuryango we.

Uwufise ububasha kw’isanamu SITE
Image caption Mr McGown yafashwe bugwate kuva muri 2011

Aya mashusho kandi yanerekanye umunya Afurika y'Epfo Stephen McGown abaza igihe ibibazo bye bizarangirira.

Umutekano wa Mali warahungabanye cyane kuva mu mwaka wa 2013, igihe ingabo z'Ubufaransa zirukanaga abawranyi ba kiyisilamu ndetse n'abarwanyi b'aba Tuareg bari bafite ubugenzuzi bw'agace k'amajyaruguru.

Bwana Macron ashaka inkunga yisumbuye itanzwe na Sahel G5, iri gutegura ingabo 5.000 zizagabwa mu gace ka Sévaré hagati muri Mali mu kurwanya izamuka rikomeye ry'abarwanyi.

Kugeza ubu muri Mali hari abasirikare b'Ubufaransa 4.000 ndetse na 12.000 b'Umuryango w'Abibumbye bakorera mu gace.