YouTube mu guhashya umutwe w'iterabwoba wiyita leta ya kisilamu

YouTube izajya itanga ubutumwa yatoranyije bwamagana iterabwoba Uwufise ububasha kw’isanamu YouTube
Image caption YouTube izajya itanga ubutumwa yatoranyije bwamagana iterabwoba

Urubuga rwo guhererekanyirizaho amavidewo, Youtube, ruravuga ko abantu bazajya baba bashakisha amavidewo "y'icengezamatwara ry'ubuhezanguni" ruzajya rubayobora ku mavidewo yamagana iterabwoba.

Abantu bashakisha amagambo amwe n'amwe yerekeranye n'umutwe w'iterabwoba wiyita leta ya kisilamu bazajya bahita bahabwa urukurikirane rw'amavidewo asenya ahame y'uwo mutwe.

Urubuga YouTube rwavuze ko rushaka gufasha mu gutuma abantu bataba ibyihare.

Kompanyi ya YouTube yabwiye BBC ko n'ubusanzwe gushyira amavidewo y'icengezamatwara ry'umutwe w'iterabwoba wiyita leta ya kisilamu binyuranyije n'amategeko ngengamikorere ya YouTube.

Yongeyeho ko iri gushyira mu bikorwa ibitekerezo by'ubukangurambaga bugamije gutuma abantu bazibukira umutwe w'iterabwoba wiyita leta ya kisilamu, bakareba amavidewo asenya amayeri uwo mutwe ukoresha mu gushaka abayoboke.

Ni ubukangurambaga buzwi nka Redirect Method.

Uwufise ububasha kw’isanamu Redirect Method
Image caption Muri videwo imwe, umugore ukuze aramagana abarwanyi b'umutwe w'iterabwoba wiyita leta ya kisilamu

Ku ikubitiro, urubuga YouTube rwabwiye BBC ko ruzatangira ruyobora abarukoresha ku mavidewo yamagana iterabwoba bakoresha ururimi rw'Icyongereza.

Ariko rurateganya no kongeraho amavidewo ku bavuga ururimi rw'Icyarabu.