Venezuela: Inteko nshingamategeko irashinjwa gufata ubutegetsi

Abacamanza mu muhango wo kurahira mu murwa mukuru wa Venezuela, Caracas Uwufise ububasha kw’isanamu AFP / Getty Images
Image caption Abacamanza mu muhango wo kurahira mu murwa mukuru wa Venezuela, Caracas

Inteko nshingamategeko yo muri Venezuela, yiganjemo abatavugarumwe na leta, yashyizeho abacamanza 33 mu rukiko rw'ikirenga, bituma ishinjwa kugerageza gufata ubutegetsi.

Intego nshingamategeko iravuga ko, bijyanye n'itegekonshinga, ifite uburenganzira bwo gushyiraho no kwirukana abacamanza.

Ariko urukiko rwiganjemo abashyigikiye leta, rwavuze ko ishyirwaho rw'abo bacamanza ridakurikije amategeko.

Abatavuga rumwe na leta barikotsa igitutu Perezida wa Venezuela, Nicolas Maduro, kugira ngo akoreshe amatora.

Bwana Maduro yarabyanze. Ahubwo akomeje gahunda ze zo gushyiraho urundi rwego rwaba rufite ububasha bwo gusubiramo itegekonshinga, rukarusha ububasha inteko nshingamategeko.

Uru rujijo rwatumye Venezuela ubu iri mu kaga ka politiki. Abantu barapfuye mu myigaragambyo imaze amezi irwanya leta.

Nyuma y'itangazo ry'inteko nshingamategeko, leta yavuze ko itazemera ko abacamanza bari basanzweho bava mu mirimo yabo.

Urukiko rw'ikirenga rwategetse ko abategetsi ba gisivili n'abagisirikari bakoresha imbaraga mu guhangana n'ishyirwaho rw'abo bacamanza. Ariko ntibizwi neza icyo ibyo bivuze.

Hagati aho, ishyaka ritavuga rumwe na leta rya Democratic Unity coalition (MUD) ryahamagaje imyigaragambyo kuri uyu wa gatandatu mu bice birindwi by'umurwa mukuru Caracas, yerekeza ku biro by'urukiko rw'ikirenga.

Abatavuga rumwe na leta baravuga ko abacamanza bariho ubu batemewe n'amategeko. Ngo bashyizweho hutihuti nyuma gato yaho ishyaka riri ku butegetsi ritakarije ubwiganze mu mwaka wa 2015.

Mu cyumweru gishize, abatavuga rumwe na leta bavuze ko bazashyiraho abacamanza bashya ndetse bagafata iya mbere mu gushyiraho leta y'ubumwe.

Abasesenguzi baravuga ko ibyifuzo nk'ibi bituma bishoboka ko habaho leta ebyiri zikora zibangikanye.

Ku wa kane, Abanyavenezuela babarirwa muri za miliyoni bitabiriye imyigaragambyo yari yahamagajwe n'abatavuga rumwe na leta.

Abantu bagera kuri batatu barishwe mu bushyamirane hagati ya polisi n'abigaragambya. Abarenga 300 batawe muri yombi.

Colombia, Ubufaransa, Espanye, Leta Zunze Ubumwe z'Amerika n'Ubumwe bw'Uburayi, byasabye leta ya Venezuela kuburizamo amatora y'urundi rwego rw'inteko nshingamategeko ateganyijwe ku itariki 30 y'uku kwezi kwa karindwi.

Bwana Maduro ibyo ntabikozwa.